Ijtimoiy tarmoqlarda Andijonda 8-mart — Xalqaro xotin qizlar kuni munosabati bilan uyushtiriladigan respublika tadbirida qatnashish uchun ming dollar talab qilinayotgani to‘g‘risida xabarlar tarqaldi. Andijon viloyat hokimligi matbuot xizmati mazkur holatga munosabat bildirdi.
Ma’lum qilinishicha, Andijon viloyatidan 8-mart — Xalqaro xotin-qizlar kuni bayrami munosabati bilan respublika tadbiriga 2019—2021-yillar davomida yuborilgan xotin-qizlarning tarkibi ko‘rib chiqilganda 3 yil davomida qatnashgan ayollarning takroran yuborilganlik holati aniqlanmagan.
Ta’kidlanishicha, bayram tadbiriga yuborilgan xotin-qizlarning davlat va jamoat ishlarida faol, tashabbuskor, mamlakat ravnaqi uchun xizmat qilib kelayotgan xotin-qizlarning nomzodlari taqdim etilgan.
Hozirda ijtimoiy tarmoqlarda qayd etilgan haqiqatga to‘g‘ri kelmaydigan, mazkur tadbirda qatnashish uchun yuborilishi yuzasidan berilgan asossiz ma’lumot bo‘yicha huquq-tartibot organlari tomonidan o‘rganish ishlari olib borilmoqda. Belgilangan tartibda qonuniy chora ko‘rilishi ta’minlanadi.
“Hurmatli fuqarolar, asossiz va yolg‘on xabar tarqatishdan ehtiyot bo‘ling. Zero yuqorida keltirilgani kabi yolg‘on xabarni tarqatgan shaxs qonunlarimizda belgilangan tartibda jazoga tortilishi muqarrar”, — deyiladi munosabatda.
Avvalroq Andijon shahar hokimi Bahrom Haydarov davlatga 1,7 milliard so‘m zarar yetkazganlikda ayblanayotgani, Andijondagi o‘qituvchilari uzr so‘ragan maktab direktori va tuman XTB mudiri ishdan olingani, Asaka tumani hokimi fuqarolar bilan nomaqbul tarzda suhbatlashgani to‘g‘risida xabar berilgandi.
Izoh (0)