Rossiyalik milliarderlar bir kunda 39 mlrd dollar yo‘qotdi

Rossiya prezidenti Vladimir Putinning Ukrainaga bostirib kirishga qaror qilganidan keyin rus milliarderlari bir kun ichida 39 mlrd dollar yo‘qotdi. Bu haqda Bloomberg xabar bermoqda.

“Lukoyl” boshqaruvi raisi Vagit Alekperovning boyligida eng katta pasayish kuzatildi. Bloomberg Billionaires Index ma’lumotlariga ko‘ra, Alekperov bir kunda boyligining qariyb uchdan birini — 6,2 mlrd dollar yo‘qotdi. Hozirda uning boyligi 13 mlrd dollarga tushib ketgan. 24-fevral kuni Moskvadagi neft ishlab chiqaruvchi kompaniyaning aksiyalari taxminan 33 foizga arzonlashdi.

Po‘lat ishlab chiqaruvchi “Severstal” kompaniyasi raisi Aleksey Mordashov payshanba kuni 4,2 milliard dollar yo‘qotgach, boyligi 23 mlrd dollarga tushib ketdi. Norilsk Nikel kompaniyasi prezidenti va ayni damda Rossiyaning eng boy odami Vladimir Potanin 3 milliard dollar yo‘qotdi.

Asli o‘zbek bo‘lgan rossiyalik milliarderlar Alisher Usmonov va Iskandar Mahmudov mos ravishda 1,2 mlrd dollar va 0,9 mlrd dollar yo‘qotgan.

Avvalroq Ukraina banklariga Rossiya va Belarus rubllarida operatsiyalar o‘tkazish ta’qiqlangani haqida xabar berilgan edi.