O‘zbekiston YeOIIning iqlim, raqamlashtirish va logistika loyihalariga qo‘shilmoqchi

O‘zbekiston YeOIIning iqlim, raqamlashtirish va logistika loyihalariga qo‘shilmoqchi. Bu haqda Nur-Sulton shahrida bo‘lib o‘tgan Yevrosiyo hukumatlararo kengashining kengaytirilgan yig‘ilishida bosh vazir Abdulla Aripov ma’lum qildi, deb xabar beradi Sputnik.

“Hurmatli hamkasblardan bugungi yig‘ilishda ko‘rib chiqilgan elektron tijoratni rivojlantirish, temiryo‘l yuklarini raqamlashtirish, ‘Yevrosiyo ekspress’ logistika loyihasi va iqlim masalalari bo‘yicha hamkorlik kabi tashabbuslarda O‘zbekiston ishtirokini ma’qullashni so‘rayman”, — deydi Aripov.

Eslatib o‘tamiz, O‘zbekiston prezident Shavkat Mirziyoyev 2021-yil dekabr oyida bo‘lib o‘tgan YeOII davlatlari rahbarlarining sammitida Yevrosiyo hududida muhim biznes tashabbus va dasturlarini amalga oshirishda kuzatuvchi-davlatlarni faolroq jalb etish hamda YeOI komissiyasi organlarida kuzatuvchi davlatlarning ishtirok etish imkoniyatlarini kengaytirish takliflarini bildirgandi.

24—25-fevral kunlari Nur-Sultonda bo‘lib o‘tgan Yevrosiyo hukumatlararo kengashi yakunlari bo‘yicha imzolangan hujjatlar ro‘yxati e’lon qilingan. Ulardan biri — “O‘zbekiston Respublikasining Yevrosiyo iqtisodiy ittifoqining ayrim tashabbuslarida ishtirok etishi to‘g‘risida”gi masala bo‘yicha ko‘rsatma.

Nashrning yozishicha, O‘zbekiston barcha ochiq tadbirlarda va muhokamalarda ishtirok etish imkoniyatiga ega, bu esa bu ittifoqqa keyingi integratsiya to‘g‘risida yakuniy qaror qabul qilishga imkon beradi.

Bundan avval O‘zbekiston Yevropa Ittifoqiga bojxona bojisiz eksport qiladigan mahsulotlar qatori ikki barobarga oshgani, Investitsiyalar va tashqi savdo vazirligi tuzilmasida Rossiya bilan hamkorlik boshqarmasi tashkil etilgani hamda O‘zbekiston YeOII bilan investitsiyaviy hamkorlikni oshirishga tayyorligi haqida xabar berilgandi.