Jizzax shahrida tadbirkordan 3 ming dollar pora talab qilgan “Hududgaz Jizzax” gaz ta’minoti filiali bo‘lim boshlig‘i va yetakchi muhandis ushlandi. Bu haqda Bosh prokuratura huzuridagi departament xabar berdi.
Ma’lum qilinishicha, departament hamda DXXning Jizzax viloyati boshqarmalari tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Tadbirda “Hududgaz Jizzax” gaz ta’minoti filiali yetakchi muhandisi Sh.I. (muqaddam Jinoyat kodeksining 214-moddasi bilan sudlangan) “X.S.” MChJning tabiiy gazdan noqonuniy foydalangani holati bo‘yicha tuzilgan dalolatnomada hisoblangan 384,6 million so‘m zararni kamaytirib berishni va’da qilgani aniqlangan. U buning evaziga korxona ish yurituvchisi D.D.dan 3 ming dollar olgan vaqtida ushlangan.
Sh.I.ning ko‘rsatuviga asosan davom etgan tadbirda esa filialning shartnomaviy-huquqiy bo‘limi boshlig‘i B.R. sherigi — yetakchi muhandisdan 3 ming dollarni olgan vaqtida ashyoviy dalillar bilan qo‘lga olingan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Jizzaxda tadbirkorga 200 million so‘m imtiyozli kredit olib berish uchun 600 dollar so‘ragan davlat soliq katta inspektori ushlangani, Buxoroda “temir daftar”ga kiritish uchun 400 ming so‘m pora olgan mahalla raisi qo‘lga olingani, Toshkent viloyatida gaz zapravkani elektr tarmog‘iga ulash uchun 2 ming dollar so‘ragan bosh muhandis ushlangani to‘g‘risida xabar berilgandi.
Izoh (0)