Ўзбекистон ЕОИИнинг иқлим, рақамлаштириш ва логистика лойиҳаларига қўшилмоқчи. Бу ҳақда Нур-Султон шаҳрида бўлиб ўтган Евросиё ҳукуматлараро кенгашининг кенгайтирилган йиғилишида бош вазир Абдулла Арипов маълум қилди, деб хабар беради Sputnik.
«Ҳурматли ҳамкасблардан бугунги йиғилишда кўриб чиқилган электрон тижоратни ривожлантириш, темир йўл юкларини рақамлаштириш, ‘Евросиё экспресс’ логистика лойиҳаси ва иқлим масалалари бўйича ҳамкорлик каби ташаббусларда Ўзбекистон иштирокини маъқуллашни сўрайман», — дейди Арипов.
Эслатиб ўтамиз, Ўзбекистон президент Шавкат Мирзиёев 2021 йил декабрь ойида бўлиб ўтган ЕОИИ давлатлари раҳбарларининг саммитида Евросиё ҳудудида муҳим бизнес ташаббус ва дастурларини амалга оширишда кузатувчи-давлатларни фаолроқ жалб этиш ҳамда ЕОИ комиссияси органларида кузатувчи давлатларнинг иштирок этиш имкониятларини кенгайтириш таклифларини билдирганди.
24—25 февраль кунлари Нур-Султонда бўлиб ўтган Евросиё ҳукуматлараро кенгаши якунлари бўйича имзоланган ҳужжатлар рўйхати эълон қилинган. Улардан бири — «Ўзбекистон Республикасининг Евросиё иқтисодий иттифоқининг айрим ташаббусларида иштирок этиши тўғрисида»ги масала бўйича кўрсатма.
«Биз Ўзбекистоннинг кузатувчи-давлат мақомини ҳисобга олган ҳолда ЕОИИнинг алоҳида лойиҳалар бўйича ишида иштирок этиш ташаббусини кўриб чиқдик», — дейди Қирғизистон бош вазири Оқилбек Жапаров Евросиё ҳамкорлиги йиғилиши якунлари бўйича матбуотга берган интервьюсида.
Нашрнинг ёзишича, Ўзбекистон барча очиқ тадбирларда ва муҳокамаларда иштирок этиш имкониятига эга, бу эса бу иттифоққа кейинги интеграция тўғрисида якуний қарор қабул қилишга имкон беради.
Бундан аввал Ўзбекистон Европа Иттифоқига божхона божисиз экспорт қиладиган маҳсулотлар қатори икки баробарга ошгани, Инвестициялар ва ташқи савдо вазирлиги тузилмасида Россия билан ҳамкорлик бошқармаси ташкил этилгани ҳамда Ўзбекистон ЕОИИ билан инвестициявий ҳамкорликни оширишга тайёрлиги ҳақида хабар берилганди.
Изоҳ (0)