Ukraina va Rossiya voqealari fonida iqtisodiyotda yuz berayotgan asosiy voqealar: rubl qadrsizlanmoqda, neft va gaz qimmatlashmoqda

Ukrainada yuz berayotgan voqealar ortidan jahon iqtisodiyotida ham muhim o‘zgarishlar yuz bermoqda.

Valyutalar

Rossiya rubli xalqaro savdolarda qadrsizlanmoqda. 24-fevral, payshanba kuni ertalab birjalarda yevroning narxi 101 rublga, dollarniki esa 90 rublga yaqinlashdi.

Ayirboshlash punktlarida dollar 95 dan 108 rublgacha, yevro esa 105 dan 120 rublgacha sotilmoqda

Bu — tarixiy voqealar. Hatto 2014-yilda, Qrim voqealari sodir bo‘lganda ham rubl bu darajada qadrsizlanmagan edi.

Rossiya birjalari vaqti-vaqti bilan savdolarni to‘xtatib turibdi. Rossiya Markaziy banki rubl kursini oshirish uchun valyuta intervensiyalarini e’lon qildi.

Neft va gaz 

Brent markali neft narxi 2014-yil sentabr oyidan beri birinchi marta bir barrel uchun 103 dollargacha ko‘tarildi. Yevropada gaz almashinuvi narxi 41 foizga oshdi. Bu gaz fyucherslari uchun 190 yevroga yaqinlashgan o‘tgan dekabrdan beri eng yuqori yoqilg‘i narxidir.

Qimmatbaho metallar

Oltin 1,63 foizga oshib, troya unsiyasi uchun 1938 dollarni tashkil qilmoqda. Palladiy esa 1,64 foizga oshib, unsiyasi uchun 2522 dollarni tashkil qilmoqda.

Kumush esa 1,8 foizga oshib, unsiyasi 25 dollarni tashkil qildi. Platinaning narxi esa 0,95 foizga oshib, 1102 dollarga yetdi. 

Kompaniyalar

Rubl kursidan keyin Rossiya kompaniyalarining aksiyalari keskin tushib ketdi. Ayrim kompaniya aksiyalarining pasayishi deyarli 50 foizni tashkil etdi. Rossiya kompaniyalari uchun “Qora payshanba”:

Transport

Mamlakatlar va aviakompaniyalar Ukrainaga parvozlarni bekor qilishdi. Uzbekistan Airways Ukraina havo hududi yo‘lovchi havo kemalari qatnovlari uchun yopilishi munosabati bilan Kiyevga parvozlar bekor qilinganini ma’lum qildi.

Xizmatlar

Foydalanuvchilar Telegram’dagi uzilishlar bilan bog‘liq muammolar haqida xabar berishmoqda. Downdetector ma’lumotlariga ko‘ra, 2500 dan ortiq xabarlarda xatolar kuzatilgan.

Sanksiyalar

Rossiyaga qarshi yangi sanksiyalar hali joriy etilmagan. Yevrokomissiya rahbari Ursula fon der Lyayen Rossiya iqtisodiyotining strategik tarmoqlariga qarshi sanksiyalar joriy etishini va Rossiya banklarining Yevropa moliya bozorlariga kirishini to‘sib qo‘yishini ma’lum qildi.