Geosiyosat tufayli rublning o‘zgaruvchanligi pandemiya boshlanganidan beri maksimal darajaga yaqinlashdi. Natijada rubl bu ko‘rsatkich bo‘yicha turk lirasini ortda qoldirdi. Bu haqda “RBK” xabar bermoqda.
21-fevral kuni kechqurun rubl kursining o‘zgaruvchanligi 33,97 foizga yetdi. Bloomberg ma’lumotlariga ko‘ra, 21-fevraldagi savdolarda dollar kursi 79 rubldan oshdi. Ayni paytda esa bu ko‘rsatkich 80 rubldan ham yuqoriladi.
Geosiyosiy vaziyatning keskinlashuvi fonida milliy valyuta kursining o‘zgaruvchanligi pandemiya boshlanganidan beri maksimal qiymatga yaqinlashgani aytilmoqda.
2020-yil 18-martda rubl o‘zgaruvchanligi 37,7 foizni tashkil etgan. Keyinchalik rubl kursi bir dollar uchun 60-65 dan 80 rublgacha tushib ketdi.
Bir oy oldin rublning o‘zgaruvchanligi 20,7 foiz edi. Bu ko‘rsatkichga ko‘ra, yanvar oyida Rossiya valyutasi Turkiya prezidenti Rajab Toyyib Erdo‘g‘on siyosati tufayli qulagan turk lirasidan keyin dunyoda ikkinchi o‘rinda edi.
14-fevralga kelib o‘zgaruvchanlik rubl uchun 24,3 foizga ko‘tarildi, turk lirasi uchun esa 19,75 foizga tushdi. O‘shandan beri rubl dunyodagi eng beqaror valyuta bo‘lib turibdi.
Ukrainadagi mojaroning davom etayotgani hamda Donetsk va Lugansk Xalq Respublikalari mustaqilligi e’lon qilinishi haqidagi xabar investorlarning umidlarini yanada yomonlashtirdi.
Avvalroq Donbass va Lugansk aholisi Rossiyaga evakuatsiya qilinishi ortidan rubl kursi qulagani haqida xabar berilgan edi.
Izoh (0)