Геосиёсат туфайли рублнинг ўзгарувчанлиги пандемия бошланганидан бери максимал даражага яқинлашди. Натижада рубль бу кўрсаткич бўйича турк лирасини ортда қолдирди. Бу ҳақда «РБК» хабар бермоқда.
21 февраль куни кечқурун рубль курсининг ўзгарувчанлиги 33,97 фоизга етди. Bloomberg маълумотларига кўра, 21 февралдаги савдоларда доллар курси 79 рублдан ошди. Айни пайтда эса бу кўрсаткич 80 рублдан ҳам юқорилади.
Геосиёсий вазиятнинг кескинлашуви фонида миллий валюта курсининг ўзгарувчанлиги пандемия бошланганидан бери максимал қийматга яқинлашгани айтилмоқда.
2020 йил 18 мартда рубль ўзгарувчанлиги 37,7 фоизни ташкил этган. Кейинчалик рубль курси бир доллар учун 60-65 дан 80 рублгача тушиб кетди.
Бир ой олдин рублнинг ўзгарувчанлиги 20,7 фоиз эди. Бу кўрсаткичга кўра, январь ойида Россия валютаси Туркия президенти Ражаб Тоййиб Эрдўғон сиёсати туфайли қулаган турк лирасидан кейин дунёда иккинчи ўринда эди.
14 февралга келиб ўзгарувчанлик рубль учун 24,3 фоизга кўтарилди, турк лираси учун эса 19,75 фоизга тушди. Ўшандан бери рубль дунёдаги энг беқарор валюта бўлиб турибди.
Украинадаги можаронинг давом этаётгани ҳамда Донецк ва Луганск Халқ Республикалари мустақиллиги эълон қилиниши ҳақидаги хабар инвесторларнинг умидларини янада ёмонлаштирди.
Аввалроқ Донбасс ва Луганск аҳолиси Россияга эвакуация қилиниши ортидан рубль курси қулагани ҳақида хабар берилган эди.
Изоҳ (0)