Avvalroq O‘zbekistonda import avtomobillar uchun bojxona boji miqdori pasaytirilgani haqida xabar berilgan edi.
Stavkalar ikki bosqichda qisqartiriladi. Birinchisi – 2022-yilning 21-fevralidan, ikkinchisi 2023-yilning 1-yanvaridan. Nafaqat bojxona boji, balki qo‘shimcha koeffitsientlar ham o‘zgartiriladi. Bu O‘zbekiston chegarasidan olib o‘tish vaqtida ishlab chiqarilganiga bir yildan oshmagan yangi avtomobillarga tegishli (boshqalar uchun hech nima o‘zgarmaydi).
Avvalroq “Daryo” O‘zbekistonda “rastamojka” qanday hisoblanishi haqida tushuntirgan edi. Yagona bojdan tashqari, dvigatelning har bir kub santimetr, 15 foizlik QQS va utilizatsiya yig‘imlari (bazaviy hisoblash miqdorining 30 baravaridan 300 baravarigacha) uchun ham to‘lov amalga oshiriladi.
Misol №1
Hajmi 1000 kub sm bo‘lgan avtomobillar (Spark mashinasiga o‘xshash). Aytaylik, xorijda uning narxi 9 000 dollarni tashkil qiladi.
Utilizatsiya yig‘imi (bazaviy hisoblash miqdorining 30 baravari) va QQS (15 foiz) miqdori hisoblanganda “rastamojka”:
- 2022-yilning 21-fevraligacha – 7 269 dollar (avtomobil narxining 81 foizi);
- 2023-yilning 1-yanvarigacha – 4 566 dollar (51 foizi);
- 2023-yilning 1-yanvaridan keyin – 4 106 dollarni (46 foizi) tashkil qiladi.
Misol №2
Hajmi 1500 kub sm (Cobalt modeliga o’xshash) bo’lgan avtomobil. Aytaylik, mashina xorijda 14 000 dollarga tashkil qiladi.
QQS o‘zgarishsiz qoladi, ammo utilizatsiya yig‘imi bazaviy hisoblash miqdorining 120 baravariga to‘g‘ri keladi. Shunda“rastamojka”:
- 2022-yilning 21-fevraligacha — 13 356 dollar (avtomobil narxining 81 foizi);
- 2023-yilning 1-yanvarigacha — 8 871 dollar (63 foizi);
- 2023-yilning 1-yanvaridan keyin — 8 181 dollarni (58 foizi) tashkil qiladi.
Xuddi shu sxema bo‘yicha har qanday xorij avtomobili “rastamojka”sini hisoblash mumkin. Buning uchun avtomobilning aniq bahosi, ishlab chiqargan mamlakat va yili, dvigatelning ishchi hajmini bilishning o‘zi kifoya.
Shuningdek, QQS, utilizatsiya yig‘imi va bazaviy hisoblash miqdorining o‘zgarishini hisobga olish kerak.
QQS miqdori kamaysa, “rastamojka” ham qisqaradi. Bazaviy hisoblash miqdori o‘ssa, “rastamojka” ham o‘sadi. Utilizatsiya yig‘imi bilan xuddi shunday holat.
Bundan tashqari, importchining O‘zbekistongacha va undan keyingi yetkazib berish uchun qo‘shimcha xarajatlari ham bor.
Shu bilan bir qatorda, boj miqdorining pasayishi iste’molchilar uchun yakuniy narxlarga ta’sir qilishi, avtomobillar esa arzonlashishi mumkin.
Avtomobil bozorida teng sharoitlarni yaratish – bosqichma-bosqich jarayon. Avvalroq “rastamojka” bahosi shu tarzda nolga tushirilishi haqida xabar berilgan edi.
Izoh (0)