AOKAda Bandlik va mehnat munosabatlari vazirligi mutasaddilari ishtirokida o‘tgan matbuot anjumanida 2022-yilga sohada amalga oshirilishi belgilangan asosiy vazifalar haqida ma’lumot berildi.
Qayd etilishicha, kasbga o‘qitish ko‘lamini 2 barobar oshirish va 2022—2026-yillarda 1 million ishsizni kasbga o‘qitish rejalashtirilgan. Xotin-qizlarni kasb-hunarga o‘qitish 2 baravarga oshirilib, yiliga 80 mingga yetkaziladi.
Nodavlat ta’lim muassasalari bilan kasb-hunarga o‘qitishda ularning ishtiroki 30 foizga yetkaziladi. 185 ming ishsiz doimiy ish o‘rinlariga, 192 ming nafari haq to‘lanadigan jamoat ishlariga jalb etiladi. 12 ming nogironligi bor shaxsning bandligiga ko‘maklashiladi. Nogironligi bor shaxslarni ishga olgan korxonalar uchun 25 milliard subsidiyalar ajratiladi.
Migratsiya sohasida 50 ming nafar xorijga ketmoqchi bo‘lgan fuqaro kasb-hunar va xorijiy tillarga o‘qitiladi. 21 ming nafar fuqaroga xorijiy davlatlarda tan olinadigan malaka sertifikatlarini olish, yo‘l chiptasini xarid qilish, rivojlangan davlatlar ishchi vizasini olish uchun subsidiya ajratiladi.
160 ming migratsiyadan qaytgan fuqaroning bandligiga ko‘maklashiladi, “O‘z kelajagim — o‘zim investor” loyihasi doirasida 20 ming nafarini tadbirkorlik faoliyatiga kompleks paket ko‘rinishida ko‘maklashishga yordam beriladi.
Izoh (0)