Buxoro viloyati G‘ijduvon tumanida pul evaziga haydovchilik guvohnomasini olib berishni va’da qilgan avtomaktab o‘qituvchisiga sud hukmi o‘qildi, deb xabar beradi Oliy sud matbuot xizmati.
Ma’lum bo‘lishicha, F.A. ismli fuqaro haydovchilik guvohnomasi olish maqsadida tumandagi “Mirshod avtomaktab” mas’uliyati cheklangan jamiyatida o‘qituvchi vazifasida ishlovchi A.N. bilan uchrashgan. U fuqaro F.A.dan “B, C” toifadagi haydovchilik guvohnomasi olish uchun imtihondan o‘tkazish, tibbiy ma’lumotnoma olib berish hamda haydovchilik kursida o‘qiganlik to‘g‘risida hujjatlarni tayyorlab berish evaziga 3 million so‘m pul so‘ragan.
O‘qituvchi 3 million so‘m pulni olgan vaqtda huquqni muhofaza qiluvchi idoralar vakillari tomonidan jinoyat ustida ushlangan.
Mazkur holat yuzasidan o‘tkazilgan sud majlisida A.N. Jinoyat kodeksining 59-moddasi tartibida tayinlangan jazolarni qisman qo‘shish yo‘li bilan uzil-kesil 2 yil muddatga muayyan huquqdan, ya’ni avtomototransport vositalari va shahar elektr transport vositalari haydovchilarini tayyorlash, qayta tayyorlash hamda ularning malakasini oshirish muassasalarida ishlash huquqidan mahrum qilingan. Unga oylik ish haqining 20 foizini davlat daromadiga undirish sharti bilan 3 yil muddatga axloq tuzatish ishlari jazosi tayinlangan.
Eslatib o‘tamiz, 2021-yilning dekabrida Buxoro viloyatining G‘ijduvon tumanida fuqaroga haydovchilik guvohnomasi olib berish uchun 3 million so‘m pora olgan avtomaktab o‘qituvchisi ushlangani haqida xabar berilgan edi.
Mavzuga doir:
- Toshkent va Andijonda qisqa muddatda haydovchilik guvohnomasini olib berishni va’da qilgan shaxslar ushlandi
- Namangan va Qoraqalpog‘istonda fuqarolarga qisqa muddatda haydovchilik guvohnomalarini olib berishni va’da qilgan shaxslar ushlandi
- Toshkentda 900 dollarga “prava”ni imtihonsiz olib bermoqchi bo‘lgan shaxslar ushlandi
- Samarqandda darslarga qatnashmasdan, 20 kunda “prava” olib berishni va’da qilgan xususiy maktab rahbari ushlandi
Izoh (0)