Самбо бўйича жаҳон чемпиони Камолиддин Расулов ўлими юзасидан бўлиб ўтаётган суд мажлисида марҳумнинг айбланувчига «Ҳумо Троп» витаминини сотгани, натижада айбланувчи спортчининг соғлиғи ёмонлашиб, ўлимига сабаб бўлиши мумкинлиги ҳақидаги маълумотларга аниқлик киритилди. Бу ҳақда суд ишида қатнашган «Дарё» мухбири хабар берди.
Судда сўз олган гувоҳлардан бири А.Қ.нинг айтишича, у айбланувчи ва марҳумни яқиндан таниган. «Ҳар иккалови билан ҳам бир залда машғулот ўтардик», — дейди у.
Гувоҳ сўзларига кўра, Камолиддин Расулов айбланувчи Ш.Т.нинг сўрови билан унга «Ҳумо Троп» витаминини шахсан ўзи олиб келиб берган. Ш.Т. эса Камолиддин Расуловнинг тавсиясига кўра, айтилган дозадан кўпроқ витамин қабул қилган ва шундан сўнг тоби қочиб қолган.
«Ўша витаминдан сўнг ўртоғимнинг иссиғи чиқиб, кечаси ухлолмай чиқарди. Шахсан ўзим уни бир неча маротаба шифохоналарга олиб борганман. Шифокорлар унинг юраги секин ураётганини, жигари катталашганини айтишди», — дейди гувоҳ витамин воқеаси ҳақида гапирар экан.
Гувоҳга юзланган марҳумнинг беваси Гулноза Холмуродова: «Айбланувчининг тоби қочиши айнан ўша витамин билан боғлиқми, шифокорлар айнан шу витамин сабаб унинг юраги секин ураётганию, жигари катталашган дейишдими?», дея савол берди. Гувоҳ эса айбланувчи витамин қабул қилгунга қадар соғлом ва бақувват бўлганини, соғлиғида ҳеч қандай муаммо бўлмаганини билдирди.
Суд ишида 2022 йилнинг 25 февраль куни соат 14:30 гача танаффус эълон қилинди.
Эслатиб ўтамиз, ўша пайтда спортчининг ўлими ҳақида жамоатчиликка ахборот берган Бош прокуратура ахборот хизмати айбланувчи Ш.Т. таниши, ҳарбий хизматчи Камолиддин Расуловга қўнғироқ қилиб, ундан харид қилиб олган «Ҳумо Троп» витаминини тавсиясига кўра истеъмол қилгани натижасида соғлиғи ёмонлашганини, шифокорлар бу касалликнинг давоси йўқ деб айтгани хабар қилганди.
Изоҳ (0)