Samarqandda Yevropa davlatlariga ishga yuborish uchun 50 dan ortiq odamdan pul olib, ularni chuv tushirgan shaxslarga nisbatan sud hukmi o‘qildi. Bu haqda “Yoshlar” telekanali orqali efirga uzatilgan lavhada ma’lum qilindi.
Ma’lum qilinishicha, ushbu shaxslar Farg‘ona shahrida rasmiy ro‘yxatga olingan “Unistav” xususiy bandlik agentligining Samarqand shahridagi filialini 2019-yil mart oylarida tashkil qilgan. Ular mazkur jamiyat orqali fuqarolarni Yevropaning Polsha, Litva, Latviya va boshqa davlatlariga shartnoma asosida 90 kun ichida jo‘natishni va’da bergan. O‘z xizmati evaziga esa fuqarolardan 400—900 dollar miqdorida pul olgan.
Ammo oradan 90 kun o‘tgach, idora sifatida ochilgan binoga qulf osilgan, “xizmat ko‘rsatgan” shaxslar telefonlarini o‘chirib, bloklagan.
Holat yuzasidan jinoyat ishi ochilib, gumonlanuvchilar sudda javob bergan.
Sud hukmiga ko‘ra, ayblanuvchilardan biriga 7 yil qamoq jazosi tayinlangan. Ikkinchi sudlanuvchining homiladorligi inobatga olinib, 5 yil muddatga qamoq jazosi belgilangan — u 2023-yil 26-yanvardan jazosini o‘tashni boshlaydi.
Bundan avval Samarqandda Avstraliyaga ishga yuborishni va’da qilib 2 kishini 6,5 ming AQSh dollariga “tushirgan” shaxs qo‘lga olingani, Buxoroda Koreyaga ishga yuborishini aytib, evaziga fuqarodan 5 ming dollar olmoqchi bo‘lgan shaxs ushlangani to‘g‘risida xabar berilgandi.
Izoh (0)