Samarqand veterinariya meditsinasi institutining maqomi oshiriladi

Shavkat Mirziyoyev 16-fevral kuni chorvachilik tarmog‘ini qo‘llab-quvvatlash yuzasidan o‘tkazgan videoselektor yig‘ilishida chorva mahsuldorligini oshirish, naslchilikni yaxshilash masalalari yuzasidan topshiriqlar berildi. Bu haqda Prezident matbuot kotibi xabar qildi.

Qayd etilishicha, sohaga ilm va ilg‘or tajribalarni joriy etishda Samarqand veterinariya meditsinasi institutining roli kuchaytirilishi ta’kidlangan. Ushbu institut maqomi oshiriladi. Unga veterinariya, chorvachilik, parrandachilik, baliqchilik, qorako‘lchilik va cho‘l ekologiyasi ilmiy-tajriba institutlari biriktiriladi.

Institut va uning filiallari barcha paxta, g‘alla va chorvachilik klasterlariga biriktiriladi, ularga amaliy va metodologik ko‘mak berib, pullik xizmatlar ko‘rsatadi. Aholi xonadonlarida qoramol, qo‘y, echki, parranda va boshqa chorvani ko‘paytirish, ozuqa ekinlarini ekish, chorva kasalliklarini oldini olish bo‘yicha “mahallabay” ishlashni yo‘lga qo‘yib, aholi va fermerlarni qisqa muddatli kurslarda o‘qitadi.

“Chorvanasl” agentligiga har bir tuman kesimida chorvachilikda naslchilikni yaxshilash bo‘yicha uch yillik dastur ishlab chiqish va ijrosini ta’minlash topshirilgan.

Avvalroq O‘zbekistonda aholiga 350 ming bosh qo‘y va echki tarqatishga 100 mln dollar yo‘naltirilishi, Shavkat Mirziyoyev 2022-yilda go‘sht, sut va tuxum mahsulotlariga talabni qondirishda birorta hudud rahbarida aniq tasavvur yo‘qligini tanqid qilgani, aholini go‘sht bilan ta’minlash bo‘yicha o‘zgarish qilmagan tuman hokimlari ishdan olinishi mumkinligi xabar qilingan. Shuningdek, aholi bandligini ta’minlash uchun chorva va parrandalar tarqatish tajribasi yo‘lga qo‘yilishi va hokimlar yil oxiriga qadar chorvachilik yo‘nalishida 100 ming aholining bandligini ta’minlashi (draftda) haqida xabar berilgan.