Самарқандда Европа давлатларига ишга юбориш учун 50 дан ортиқ одамдан пул олиб, уларни чув туширган шахсларга нисбатан суд ҳукми ўқилди. Бу ҳақда «Ёшлар» телеканали орқали эфирга узатилган лавҳада маълум қилинди.
Маълум қилинишича, ушбу шахслар Фарғона шаҳрида расмий рўйхатга олинган «Унистав» хусусий бандлик агентлигининг Самарқанд шаҳридаги филиалини 2019 йил март ойларида ташкил қилган. Улар мазкур жамият орқали фуқароларни Европанинг Польша, Литва, Латвия ва бошқа давлатларига шартнома асосида 90 кун ичида жўнатишни ваъда берган. Ўз хизмати эвазига эса фуқаролардан 400—900 доллар миқдорида пул олган.
Аммо орадан 90 кун ўтгач, идора сифатида очилган бинога қулф осилган, «хизмат кўрсатган» шахслар телефонларини ўчириб, блоклаган.
Ҳолат юзасидан жиноят иши очилиб, гумонланувчилар судда жавоб берган.
Суд ҳукмига кўра, айбланувчилардан бирига 7 йил қамоқ жазоси тайинланган. Иккинчи судланувчининг ҳомиладорлиги инобатга олиниб, 5 йил муддатга қамоқ жазоси белгиланган — у 2023 йил 26 январдан жазосини ўташни бошлайди.
Бундан аввал Самарқандда Австралияга ишга юборишни ваъда қилиб 2 кишини 6,5 минг АҚШ долларига «туширган» шахс қўлга олингани, Бухорода Кореяга ишга юборишини айтиб, эвазига фуқародан 5 минг доллар олмоқчи бўлган шахс ушлангани тўғрисида хабар берилганди.
Изоҳ (0)