Шавкат Мирзиёев 16 февраль куни чорвачилик тармоғини қўллаб-қувватлаш юзасидан ўтказган видеоселектор йиғилишида чорва маҳсулдорлигини ошириш, наслчиликни яхшилаш масалалари юзасидан топшириқлар берилди. Бу ҳақда Президент матбуот котиби хабар қилди.
Қайд этилишича, соҳага илм ва илғор тажрибаларни жорий этишда Самарқанд ветеринария медицинаси институтининг роли кучайтирилиши таъкидланган. Ушбу институт мақоми оширилади. Унга ветеринария, чорвачилик, паррандачилик, балиқчилик, қоракўлчилик ва чўл экологияси илмий-тажриба институтлари бириктирилади.
Институт ва унинг филиаллари барча пахта, ғалла ва чорвачилик кластерларига бириктирилади, уларга амалий ва методологик кўмак бериб, пуллик хизматлар кўрсатади. Аҳоли хонадонларида қорамол, қўй, эчки, парранда ва бошқа чорвани кўпайтириш, озуқа экинларини экиш, чорва касалликларини олдини олиш бўйича «маҳаллабай» ишлашни йўлга қўйиб, аҳоли ва фермерларни қисқа муддатли курсларда ўқитади.
«Чорванасл» агентлигига ҳар бир туман кесимида чорвачиликда наслчиликни яхшилаш бўйича уч йиллик дастур ишлаб чиқиш ва ижросини таъминлаш топширилган.
Аввалроқ Ўзбекистонда аҳолига 350 минг бош қўй ва эчки тарқатишга 100 млн доллар йўналтирилиши, Шавкат Мирзиёев 2022 йилда гўшт, сут ва тухум маҳсулотларига талабни қондиришда бирорта ҳудуд раҳбарида аниқ тасаввур йўқлигини танқид қилгани, аҳолини гўшт билан таъминлаш бўйича ўзгариш қилмаган туман ҳокимлари ишдан олиниши мумкинлиги хабар қилинган. Шунингдек, аҳоли бандлигини таъминлаш учун чорва ва паррандалар тарқатиш тажрибаси йўлга қўйилиши ва ҳокимлар йил охирига қадар чорвачилик йўналишида 100 минг аҳолининг бандлигини таъминлаши (драфтда) ҳақида хабар берилган.
Изоҳ (0)