Qashqadaryo viloyatining Nishon tumanida faoliyat yurituvchi tadbirkor Gulmurod Berdiyev aholini chorva krediti bilan ta’minlab, Nishon tumanidagi xonadonlarga yetkazib berilgan chorva pullari — 650 million so‘mini ololmay sarson bo‘lmoqda. Bu haqda “Daryo”ga shikoyat qilgan tadbirkorning aytishicha, u aholiga tarqatilgan chorva mollarini qaytarib olishga borganda esa aholi noroziligiga sababchi bo‘lmoqda.
“Bank pulimni bermagach, odamlarga bergan molimni qaytarib olib bo‘lsa-da, xarajatlarimni qoplashim kerak-ku. Men ham xarajatlarimga kuyib qolmasligim lozim. Mening ham oilam, ishchilarim bor”, — deydi tadbirkor Gulmurod Berdiyev.
Tadbirkorning aytishicha, u “Agrobank” va “Mikrokreditbank”ning Nishon tumani filiallarining kafolat xatlari evaziga 20 dan ortiq xonadonga 650 million so‘mlik naslli chorva mollarini yetkazib bergan. Ammo oradan bir yil muddat o‘tsa-da, tadbirkorning puli to‘lab berilmagan.
Chorva mollari qaytarib olinishiga qarshilik bildirayotgan Normat Boboqulov mollarga yem-xashak berib boqayotganini, qilingan xarajatlariga kuyib qolmaslik uchun chorva mollarini qaytarish niyati yo‘qligini aytmoqda.
“Nega endi qilingan shuncha mehnatim va xarajatimga kuyib qolishim kerak. Men davlatning arzon, kam foizli deb aytgan chorva kreditini olganman. Avvalo kreditni bermasliklari kerak edi, berishdimi, nega unda pulini to‘lab berishmaydi”, — deydi Normat Boboqulov.
“Boyqo‘rg‘on pahlavoni” xususiy korxonasi mas’uli Gulmurod Berdiyevning aytishicha, bank rahbarlari tadbirkor mablag‘ini “bugun beramiz, ertaga beramiz”dan nariga o‘tishmayapti.
Tadbirkordan 20 million so‘mlik qora mol xarid qilgan Dilmurod Bekmirzayevning aytishicha, u bir yil davomida qora mollarni semirtirib, ularning yemishi uchun ancha mablag‘ xarajat qilgan. U tadbirkor molini qaytarib olsa, nafaqat tadbirkorni, bankni ham sudga bermoqchi.
“2021-yilning aprel oyida 20 million so‘m mablag‘ evaziga ikki bosh ho‘kiz sotib olgandim. Men bu mollarni semirtirib, ancha boqdim. Yemishi uchun ko‘p mablag‘ sarf qildim. Nega endi, semirtirib, tayyor bo‘lgan molimni birovga topshirishim kerak? Biz davlat siyosatiga ishonib, arzon va kam foizli chorva kreditidan olgandik. Endi esa bunaqa tomosha bo‘lyapti. Buni nazoratga oluvchi mas’ullar bormi?”, — deydi Dilmurod Bekmirzayev.
Tadbirkordan mol xarid qilgan yana bir fuqaro Nasiba Ismatova esa sotib olgan sigiri buzoq tug‘ganini, mollari ko‘paygach, uni tortib olishga harakat qilishayotganini adolatsizlik deb bilishini aytmoqda.
“Sotib olgan molim buzoqladi. Tuyoqlar soni ko‘paydi. Bunga yetib kelguncha men ancha mehnat qildim, xarajat qildim. Nega endi mollarim tuyoqlari soni ko‘payganda, uni tadbirkorga berib yuborishim kerak? Bank rahbariyatiga murojaat qilib, tadbirkorning pulini o‘z vaqtida to‘lab berishlarini so‘rayman. Iltimos, tadbirkor bizni bezovta qilmasin”, — deydi Nasiba Ismatova.
2021-yilning 15-dekabr kuni “Agrobank”ning Nishon tumani filialidan chorva kredit olgan Sobir Abdullayevning ma’lumot berishicha, u ta’minotchidan o‘z vaqtida chorva mollarini olgan bo‘lib, ayni kunda ularning parvarishi bilan shug‘ullanmoqda.
“Davlat siyosatiga ishongan fuqarolar bizga imkoniyat qilib berildi, deya foizi kam kreditlarni olib, oilaviy tadbirkorlikni rivojlantirmoqda. Aynan men ham oilaviy tadbirkorligimni rivojlantirish uchun bankka murojaat qilib, kredit olgandim. Rahbarlardan xalqning shu ishonchini suiiste’mol qilmasliklarini, tadbirkorga o‘z vaqtida mablag‘ini to‘lab berishlarini so‘ragan bo‘lardim. Mening esa qaytarib beradigan molim yo‘q. Hech kimga olgan mollarimni qaytarib bermoqchi emasman”, — deydi Sobir Abdullayev.
Mazkur masala yuzasidan “Daryo” muxbiri bilan suhbatlashgan bank mas’ullari muammo tez orada yechimini topishini aytgan bo‘lsa-da, oradan uch-to‘rt oydan ortiq muddat o‘tishiga qaramasdan “ana hal qilinadi, mana hal qilinadi”, degan masala hamon yechimsiz qolmoqda.
Mazkur masala yuzasidan fikr bildirgan “Agrobank” mas’ullaridan birining aytishicha, bunday paytda fuqarolar bankka murojaat qilishi kerak. Qachonki, bank rahbariyatiga murojaat qilib, kredit shartlari bajarilishi so‘ralsa, muammo yechim topadi.
Izoh (0)