“Navoiy ko‘chasida tramvay bo‘lmaydi” — Toshkent shahar hokimligi

Toshkentning Alisher Navoiy ko‘chasida tramvay bo‘lmaydi. Bu haqda Toshkent shahar hokimi o‘rinbosari Baxtiyor Rahmonov 16-fevral kuni poytaxt hokimligida bo‘lib o‘tgan matbuot anjumanida aytib o‘tdi.

“Daryo” muxbirining Alisher Navoiy ko‘chasida olib borilayotgan rekonstruksiya ishlaridan so‘ng tramvay qo‘yiladigan bo‘lsa, yana qaytadan ta’mirlash ishlari olib borilishi to‘g‘risidagi savoliga poytaxt hokimi o‘rinbosari Baxtiyor Rahmonov mazkur ko‘chada tramvay bo‘lmasligini aytdi.

“U “gaborit”da tramvay yurishi bo‘lmaydi”, — deydi u.

Transport boshqarma boshlig‘i Anvar Jo‘rayevning ta’kidlashicha, “tramvay bo‘yicha takliflar bor”.

2016-yilning 2-may kuni Toshkentda harakatlanayotgan so‘nggi tramvay yo‘nalishi — “Beshqayrag‘och” dahasi va Ippodrom o‘rtasida qatnovchi 17-yo‘nalish yopilgandi.

Shavkat Mirziyoyev 19-yanvar kuni Toshkent shahrida jamoat transportini rivojlantirish chora-tadbirlari bo‘yicha taqdimot bilan tanishgandi. “Menimcha” ko‘rsatuvida transport vazirining taqdimoti prezidentga ma’qul bo‘lmagani haqida so‘z borgan. Aynan ushbu ko‘rsatuvda telejurnalist Xayrulla Nuriddinov Toshkentga tramvay qatnovini qaytarish tarafdori ekanini aytib o‘tgan edi.

“Shahar transporti mavzusi ochilganidan foydalanib, yana bir taklifni aytmoqchiman. Aholiga qulay va sifatli transport xizmatini ko‘rsatish sohasini takomillashtirish maqsadida Toshkentga tramvaylarni qaytarish kerak, menimcha. Katta va gavjum shaharga tramvay juda asqatadi. Hammamizning esimizdaku o‘sha qulay, bejirim, bir tekisda yuradigan, muhimi, ekologiyaga zarar yetkazmaydigan qadrdon tramvaylarimiz. Bilmadim, balki xato qilayotgandirman, lekin bu mening shaxsiy fikrim. Agar poytaxt mutasaddilarining o‘rnida bo‘lganimda, ana shu tashabbus bilan chiqqan bo‘lardim”, — degandi Xayrulla Nuriddinov.

Shavkat Mirziyoyev 10-fevral kuni Samarqand viloyatiga tashrifi davomida fuqarolar murojaati sabab tramvayni Toshkentga qaytarishni aytib o‘tdi. “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — dedi prezident.