Қашқадарё вилоятининг Нишон туманида фаолият юритувчи тадбиркор Гулмурод Бердиев аҳолини чорва кредити билан таъминлаб, Нишон туманидаги хонадонларга етказиб берилган чорва пуллари — 650 миллион сўмини ололмай сарсон бўлмоқда. Бу ҳақда «Дарё»га шикоят қилган тадбиркорнинг айтишича, у аҳолига тарқатилган чорва молларини қайтариб олишга борганда эса аҳоли норозилигига сабабчи бўлмоқда.
«Банк пулимни бермагач, одамларга берган молимни қайтариб олиб бўлса-да, харажатларимни қоплашим керак-ку. Мен ҳам харажатларимга куйиб қолмаслигим лозим. Менинг ҳам оилам, ишчиларим бор», — дейди тадбиркор Гулмурод Бердиев.
Тадбиркорнинг айтишича, у «Агробанк» ва «Микрокредитбанк»нинг Нишон тумани филиалларининг кафолат хатлари эвазига 20 дан ортиқ хонадонга 650 миллион сўмлик наслли чорва молларини етказиб берган. Аммо орадан бир йил муддат ўтса-да, тадбиркорнинг пули тўлаб берилмаган.
Чорва моллари қайтариб олинишига қаршилик билдираётган Нормат Бобоқулов молларга ем-хашак бериб боқаётганини, қилинган харажатларига куйиб қолмаслик учун чорва молларини қайтариш нияти йўқлигини айтмоқда.
«Нега энди қилинган шунча меҳнатим ва харажатимга куйиб қолишим керак. Мен давлатнинг арзон, кам фоизли деб айтган чорва кредитини олганман. Аввало кредитни бермасликлари керак эди, беришдими, нега унда пулини тўлаб беришмайди», — дейди Нормат Бобоқулов.
«Бойқўрғон паҳлавони» хусусий корхонаси масъули Гулмурод Бердиевнинг айтишича, банк раҳбарлари тадбиркор маблағини «бугун берамиз, эртага берамиз»дан нарига ўтишмаяпти.
Тадбиркордан 20 миллион сўмлик қора мол харид қилган Дилмурод Бекмирзаевнинг айтишича, у бир йил давомида қора молларни семиртириб, уларнинг емиши учун анча маблағ харажат қилган. У тадбиркор молини қайтариб олса, нафақат тадбиркорни, банкни ҳам судга бермоқчи.
«2021 йилнинг апрель ойида 20 миллион сўм маблағ эвазига икки бош ҳўкиз сотиб олгандим. Мен бу молларни семиртириб, анча боқдим. Емиши учун кўп маблағ сарф қилдим. Нега энди, семиртириб, тайёр бўлган молимни бировга топширишим керак? Биз давлат сиёсатига ишониб, арзон ва кам фоизли чорва кредитидан олгандик. Энди эса бунақа томоша бўляпти. Буни назоратга олувчи масъуллар борми?», — дейди Дилмурод Бекмирзаев.
Тадбиркордан мол харид қилган яна бир фуқаро Насиба Исматова эса сотиб олган сигири бузоқ туғганини, моллари кўпайгач, уни тортиб олишга ҳаракат қилишаётганини адолатсизлик деб билишини айтмоқда.
«Сотиб олган молим бузоқлади. Туёқлар сони кўпайди. Бунга етиб келгунча мен анча меҳнат қилдим, харажат қилдим. Нега энди молларим туёқлари сони кўпайганда, уни тадбиркорга бериб юборишим керак? Банк раҳбариятига мурожаат қилиб, тадбиркорнинг пулини ўз вақтида тўлаб беришларини сўрайман. Илтимос, тадбиркор бизни безовта қилмасин», — дейди Насиба Исматова.
2021 йилнинг 15 декабрь куни «Агробанк»нинг Нишон тумани филиалидан чорва кредит олган Собир Абдуллаевнинг маълумот беришича, у таъминотчидан ўз вақтида чорва молларини олган бўлиб, айни кунда уларнинг парвариши билан шуғулланмоқда.
«Давлат сиёсатига ишонган фуқаролар бизга имконият қилиб берилди, дея фоизи кам кредитларни олиб, оилавий тадбиркорликни ривожлантирмоқда. Айнан мен ҳам оилавий тадбиркорлигимни ривожлантириш учун банкка мурожаат қилиб, кредит олгандим. Раҳбарлардан халқнинг шу ишончини суиистеъмол қилмасликларини, тадбиркорга ўз вақтида маблағини тўлаб беришларини сўраган бўлардим. Менинг эса қайтариб берадиган молим йўқ. Ҳеч кимга олган молларимни қайтариб бермоқчи эмасман», — дейди Собир Абдуллаев.
Мазкур масала юзасидан «Дарё» мухбири билан суҳбатлашган банк масъуллари муаммо тез орада ечимини топишини айтган бўлса-да, орадан уч-тўрт ойдан ортиқ муддат ўтишига қарамасдан «ана ҳал қилинади, мана ҳал қилинади», деган масала ҳамон ечимсиз қолмоқда.
Мазкур масала юзасидан фикр билдирган «Агробанк» масъулларидан бирининг айтишича, бундай пайтда фуқаролар банкка мурожаат қилиши керак. Қачонки, банк раҳбариятига мурожаат қилиб, кредит шартлари бажарилиши сўралса, муаммо ечим топади.
Изоҳ (0)