“FXXdan ham, kimyoviy quroldan ham, Putindan ham qo‘rqmayman. Jinoiy ish qo‘zg‘ashda davom etavering, men baribir jim bo‘lmayman”. Aleksey Navalniy o‘ziga qarshi ochilgan yangi ish bo‘yicha sudda nutq so‘zladi

Moskvaning Lefortovo sudi rossiyalik siyosatchi Aleksey Navalniyga nisbatan firibgarlik va sudga hurmatsizlik bo‘yicha yangi jinoiy ishni ko‘rib chiqmoqda. Dastlabki sud majlisi Navalniy 2021-yilning fevralidan beri jazo o‘tayotgan Pokrov shahridagi 2-sonli axloq tuzatish koloniyasida bo‘lib o‘tdi. Sudda ma’lum bo‘lishicha, siyosatchi 2018-yilgi prezidentlik kampaniyasi uchun ajratilgan xayriya mablag‘laridan qariyb 2,7 million rublni (35 ming dollar) o‘zlashtirganlikda ayblanmoqda. Unga ko‘ra, Navalniy pullarni “shaxsiy maqsadlari”, jumladan, Rossiya va boshqa mamlakatlardagi “bar va kafelar” uchun sarflagan.

Aleksey Navalniy o‘ziga nisbatan ochilgan yangi ish bo‘yicha sud zalida nutq so‘zladi:

Nima deb o‘ylaysiz, bu ayblovni o‘qiganimda qanday his-tuyg‘ularni boshdan kechirdim? Xursandchilikni! Hozir sababini tushuntiraman. Men bizni qo‘llab-quvvatlayotganlar bilan faxrlanaman: 2011-yildan beri 300 000 kishi bizga pul berdi. Bu ishda mendan hafsalasi pir bo‘lganlar ko‘p bo‘lsa kerak, deb o‘ylagandim, lekin faqat to‘rt kishi ariza beribdi. Meni qo‘rqitganlarning birortasi ariza yozmaganidan xursand bo‘ldim.

Men shahd bilan kurashishda davom etaman. Federal xavfsizlik xizmatidan ham, kimyoviy quroldan ham, Putindan ham qo‘rqmayman. Haqorat qilish to‘g‘risidagi ayblovlarga esa nima deb izoh berishniyam bilmayman. “Tugatib oling, kutib turaman” degan gap kimga nisbatan haqorat? Prokurorgami? Sudyalargami? Bu qo‘rqitishga urinish: agar jim turmasang, bizdan qo‘rqmasang, senga nisbatan jinoiy ish ortidan jinoiy ish qo‘zg‘ataveramiz, degan ma’nodagi po‘pisa. Ha, qo‘zg‘atavering, men baribir jim bo‘lmayman. Men qo‘rqmayman va qolganlarni ham qo‘rqmaslikka chaqiraman. Aksincha, butun umrimizni qashshoqlikda, tanazzulda va istiqbol ko‘rmay o‘tkazishdan qo‘rqishimiz kerak.

Moskva shahar sudining ma’lum qilishicha, Navalniyga qarshi yangi jinoiy ishni olib borayotgan prokuror davlat himoyasiga olingan.

“Prokuror davlat himoyasiga olingan. Odatda, xavfsizlikka tahdid yuzaga kelgan taqdirda shunday qilinadi”, — deyiladi sud matbuot xizmati xabarida. Prokurorning xavfsizligiga qanday tahdid bo‘layotgani haqida Moskva shahar sudi izoh bermagan.