“Narx-navo o‘syapti. Shuning uchun maoshlarni oshiramiz” — Qirg‘iziston bosh vaziri

Qirg‘iziston hukumati narx-navoning o‘sishini to‘xtata olmaydi, shuning uchun maoshlar, pensiya va nafaqalarni “keskin oshirmoqchi”. Bu haqda 1-fevral kuni bo‘lib o‘tgan matbuot anjumanida Vazirlar Mahkamasi raisi Oqilbek Japarov ma’lum qildi, deb yozadi Kaktus.media.

Bosh vazirning so‘zlariga ko‘ra, butun dunyo bo‘ylab narxlar oshishi kutilmoqda, respublika tovarlarning 67 foizini import qilishi sababli inflyatsiya ham “import bo‘lib kelmoqda”.

“Biz xalqimiz farovonligini ko‘tarishimiz kerak. Shuning uchun davlat xarajatlarini oshiryapmiz, budjet 400 milliard somni tashkil etadi. 1-apreldan ish haqi, nafaqa va pensiyalarni keskin oshiramiz. O‘tgan yili pensiya, nafaqa va maoshlar 19 milliard somga oshgan. Bu asosan huquqni muhofaza qilish blokiga talluqli bo‘lgan. Endi davlat va munitsipal xizmatchilarga, shifokor va o‘qituvchilarga, madaniyat arboblariga navbat beramiz”, — deya Japarovning so‘zlaridan iqtibos keltiradi Kaktus.media.

Uning ta’kidlashicha, “Vazirlar Mahkamasi aniq tashxisni biladi, muolajani to‘g‘ri tanlaydi va eng muhimi, ular mamlakat iqtisodiyotini davolaydigan yaxshi shifokorlardir”.

Aprel oyidan boshlab ish haqi, pensiya va nafaqalar qancha oshishiga bosh vazir aniqlik kiritmagan.

2021-yilning dekabr oyida Qirg‘iziston prezidenti Sadir Japarov fermerlar va dehqon xo‘jaliklarini 3 yilga yer solig‘idan ozod etish to‘g‘risidagi farmonni imzolagan edi. Undan avval esa Sadir Japarov Yuqori Kengash (parlament) deputatlarining maoshini qisqartirgan. Shuningdek, parlament a’zolarinining texnik xarajatlari ham kamaytirilgan edi.