Gonduras sudi mamlakatning sobiq prezidenti Xuan Orlando Ernandesni giyohvand moddalar va qurol-yarog‘ savdosida gumon qilib, hibsga olish bo‘yicha qaror chiqardi, deb xabar beradi Reuters.
Agentlik ma’lumotlariga ko‘ra, Ernandes yaqin kunlar ichida Oliy sud qarshida javob berishi kerak.
Ernandes Gondurasni 2014-yildan beri boshqarib kelayotgan edi, 2022-yilning yanvarida esa iste’foga chiqqan. 15-fevral tongida politsiyachilar poytaxt Tegusigalpadagi uyiga kelgan. Sobiq prezident Facebook’dagi sahifasiga himoyalanishga tayyorligini yozib qoldirgan.
The New York Times’ning qayd etishicha, AQSh hukumati uni giyohvand moddalar saqlashda ayblab, Qo‘shma Shtatlarga ekstraditsiya qilishni so‘ragan. Amerika rasmiylarining ma’lumotlari bo‘yicha, Ernandes “noqonuniy giyohvand moddalar savdosi bilan shug‘ullanish uchun til biriktirish”da ishtirok etgan. Natijada 2004-yildan buyon Gonduras orqali mamlakatga Venesuela va Kolumbiyadan 500 tonna kokain olib kelingan. Sobiq prezident yetkazib berish va narkokuryerlarning himoyasi uchun millionlab dollar pora olgan.
Ernandesning ukasi Xuan Antonio noqonuniy kokain savdosi bilan shug‘ullangani uchun AQShda umrbod qamoq jazosini o‘tamoqda. Jinoiy to‘daning sobiq rahbari Devis Lionel Maradiganing so‘zlariga ko‘ra, Los Cachiros karteli sobiq prezident Xuan Orlando Ernandesning opasi Hilda Ernandesga 2012-yilda 250 ming dollar naqd pul bergan. O‘sha paytda Ernandes kongressmen va prezidentlikka nomzod edi. Yana 50 ming dollarni 2014-yili, Xuan Orlando Ernandes prezident bo‘lganidan keyin uning akasi Xuan Antonio Ernandes olgan.
Izoh (0)