Москванинг Лефортово суди россиялик сиёсатчи Алексей Навальнийга нисбатан фирибгарлик ва судга ҳурматсизлик бўйича янги жиноий ишни кўриб чиқмоқда. Дастлабки суд мажлиси Навальний 2021 йилнинг февралидан бери жазо ўтаётган Покров шаҳридаги 2-сонли ахлоқ тузатиш колониясида бўлиб ўтди. Судда маълум бўлишича, сиёсатчи 2018 йилги президентлик кампанияси учун ажратилган хайрия маблағларидан қарийб 2,7 миллион рублни (35 минг доллар) ўзлаштирганликда айбланмоқда. Унга кўра, Навальний пулларни «шахсий мақсадлари», жумладан, Россия ва бошқа мамлакатлардаги «бар ва кафелар» учун сарфлаган.
Алексей Навальний ўзига нисбатан очилган янги иш бўйича суд залида нутқ сўзлади:
Нима деб ўйлайсиз, бу айбловни ўқиганимда қандай ҳис-туйғуларни бошдан кечирдим? Хурсандчиликни! Ҳозир сабабини тушунтираман. Мен бизни қўллаб-қувватлаётганлар билан фахрланаман: 2011 йилдан бери 300 000 киши бизга пул берди. Бу ишда мендан ҳафсаласи пир бўлганлар кўп бўлса керак, деб ўйлагандим, лекин фақат тўрт киши ариза берибди. Мени қўрқитганларнинг бирортаси ариза ёзмаганидан хурсанд бўлдим.Сиёсатчи устидан кейинги суд мажлиси 21 февраль куни бўлиб ўтади.Мен шаҳд билан курашишда давом этаман. Федерал хавфсизлик хизматидан ҳам, кимёвий қуролдан ҳам, Путиндан ҳам қўрқмайман. Ҳақорат қилиш тўғрисидаги айбловларга эса нима деб изоҳ беришниям билмайман. «Тугатиб олинг, кутиб тураман» деган гап кимга нисбатан ҳақорат? Прокуроргами? Судьяларгами? Бу қўрқитишга уриниш: агар жим турмасанг, биздан қўрқмасанг, сенга нисбатан жиноий иш ортидан жиноий иш қўзғатаверамиз, деган маънодаги пўписа. Ҳа, қўзғатаверинг, мен барибир жим бўлмайман. Мен қўрқмайман ва қолганларни ҳам қўрқмасликка чақираман. Аксинча, бутун умримизни қашшоқликда, таназзулда ва истиқбол кўрмай ўтказишдан қўрқишимиз керак.
Москва шаҳар судининг маълум қилишича, Навальнийга қарши янги жиноий ишни олиб бораётган прокурор давлат ҳимоясига олинган.
«Прокурор давлат ҳимоясига олинган. Одатда, хавфсизликка таҳдид юзага келган тақдирда шундай қилинади», — дейилади суд матбуот хизмати хабарида. Прокурорнинг хавфсизлигига қандай таҳдид бўлаётгани ҳақида Москва шаҳар суди изоҳ бермаган.
Изоҳ (0)