Rossiya Qurolli kuchlarining Janubiy harbiy okrug bo‘linmalari Qrimda joylashgan poligonlardagi taktik mashg‘ulotlar yakunlangach yarim orolni tark etdi. Bu haqda Rossiya mudofaa vazirligiga tayanib, Meduza xabar berdi.
Harbiy xizmatchilar va harbiy texnika, jumladan, tanklar, piyoda askarlarning jangovar mashinalari va artilleriya moslamalari temiryo‘l orqali doimiy joylashish punktlariga qaytmoqda. Harbiylarning ma’lumotlariga ko‘ra, qo‘shinlar allaqachon Qrim ko‘prigi orqali Kerch bo‘g‘ozini kesib o‘tgan.
Mashqlar yakunlanishidan oldin “Dovul” va “Grad” ko‘p martalik o‘t ochish reaktiv tizimlarining ekipajlari Kerchdan 40 kilometr uzoqlikdagi Opuk poligonida jonli o‘q otish amaliyotlarini bajargan. Mudofaa vazirligi mashg‘ulotlar videosini e’lon qildi.
15-fevral kuni Mudofaa vazirligi G‘arbiy va Janubiy harbiy okrug bo‘linmalari mashg‘ulotlardan so‘ng harbiy garnizonlarga qaytishga hozirlik ko‘rayotganini ma’lum qildi. Vazirlik aynan qaysi hududlardagi harbiylarning qaytishiga aniqlik kiritmagandi. Idorada ta’kidlanishicha, boshqa harbiy okruglar, flot va havo-desant bo‘linmalari o‘quv mashg‘ulotlarini davom ettirmoqda.
Conflict Intelligence Team (CIT) surishtiruv guruhi 13-fevral holatiga Qora dengizda 11 ta yirik desant kemasidan iborat guruh borligini ma’lum qilgandi. Bundan tashqari, Qora va O‘rta yer dengizlarida uchta 1164 “Atlant” loyihasining raketa kreyserlari boshchiligidagi uchta kreyser zarba beruvchi guruh joylashgandi.
CIT asoschisi Ruslan Levyev 6-fevral kuni “Dojd” telekanaliga aytishicha, Qrimdagi Opuk poligonida “Qodirovlar” — Grozniyda joylashgan va Rossiya gvardiyasi tarkibiga kiruvchi “Sever” polki kuzga tashlangan. Ushbu bo‘linmaning Grozniyga qaytgan yoki yo‘qligi hali noma’lum.
G‘arb davlatlari ma’lumotlariga ko‘ra, Rossiya Ukraina chegaralari yaqinida 100-150 ming qo‘shin to‘plagan, ular Rossiya Ukrainaga bostirib kirishidan xavotida. Rossiya esa qo‘shinlarning harakatini harbiy mashg‘ulotlar bilan izohlamoqda.
Avvalroq AQSh Rossiyaning Ukraina bilan chegara hududidan harbiy qo‘shinlarini haqiqatda boshqa yerga ko‘chirayotganini tekshirib, barchasiga ishonch hosil qilmoqchiligini bildirdi.
Izoh (0)