Toshkent shahri Chilonzor tumanida joylashgan G‘afur G‘ulom bog‘i 2022-yil yoz faslida tashrif buyuruvchilar uchun ochiladi. Bu haqda tuman hokimligi xabar qildi.
Qayd etilishicha, BMP Smart Decision korxonasiga G‘afur G‘ulom nomidagi istirohat bog‘ini tubdan rekonstruksiyasi topshirilgan. Hozirgi kunda 4 million dollar miqdorida investitsiya kiritilgan. Umumiy rejaga asosan investitsiyalar hajmi 10 million dollarga boradi.
Rekonstruksiya davomida parkdagi hamma attraksionlarni yangilanadi. 30 ta attraksion masalasida Rossiya, Xitoy, Ukraina, Turkiya korxonalari bilan shartnomalar tuzilgan. 90 foiz attraksion allaqachon O‘zbekistonga kelgan, qolgani yo‘lda.
Parkdagi rekonstruksiya davrida mavjud 9 ming tup daraxtdan birortasi ham kesilmaydi.
“Park 2022-yil yozida ishga tushishi kutilmoqda. Bu orqali 400 ta ishchi o‘rni yaratamiz va kuniga 10 ming mehmon bemalol hordiq chiqarishi mumkin bo‘ladi”, — deydi korxona mas’ul xodimi.
G‘afur G‘ulom bog‘i 2019-yil 9-avgustdagi Vazirlar Mahkamasining F-670 son farmoyishi hamda Toshkent shahar hokimining 15-avgustdagi 1126-son farmoyishi asosida (ikkala hujjat matni ham ochiq manbalarga joylashtirilmagan) BMP Smart Decision’ga 49 yilga ijaraga berilgan. Kompaniya investitsion majburiyatlari doirasida bog‘ni jahon standartlariga javob beradigan qilib qayta ta’mirlashi, eskirgan attraksionlarni yangisiga almashtirishi lozim.
“1980-yillarda o‘rnatilgan eski attraksionlarni yangilariga almashtirish, shuningdek, bog‘ning yashil hududini, bog‘da o‘sayotgan Davlat ekologiya va atrof-muhitni muhofaza qilish qo‘mitasi xatlovidan o‘tkazilgan daraxtlarga qo‘shimcha ravishda yangi daraxtlar bilan to‘ldirishni o‘z ichiga oladi. Rekonstruksiyadan keyin ham bog‘ hududiga kirish avvalgiday bepulligicha qoladi”, — deya iyul boshida G‘afur G‘ulom bog‘i o‘rnida yangi turar joylar va biznes markaz qurilishi haqida tarqalgan xabarlarni inkor etgandi Toshkent shahar hokimligi.
Keyinroq G‘afur G‘ulom parkini ijaraga olgan Singapur kompaniyasining ta’sischisi O‘zbekiston fuqarosi, Yakkasaroy tumanida yashovchi Sherzod Halimov ekani ma’lum bo‘ldi
2019-yil sentabr oyida Toshkent shahar hokimi Jahongir Ortiqxo‘jayev poytaxt aholisi bilan uchrashib, Chilonzor tumanidagi G‘afur G‘ulom nomidagi madaniyat va istirohat bog‘ida qanday o‘zgarishlar bo‘lishi haqida ma’lumot bergan. Hokim bog‘ rekonstruksiyasi vaqtida birorta daraxt kesilmasligini aytgan, ushbu uchrashuvda investor vakili sifatida Sherzod Halimovning o‘zi ham ishtirok etgandi.
“Gazeta.uz” nashrining yozishicha, “Nuz.uz” ushbu uchrashuv haqida xabar qilgan (ammo xabar o‘chib ketgan, uning nusxasi “My Tashkent.uz”da saqlanib qolgan). Chilonzor tumani hokimi Sarvar Mahametov BMP Smart Decision kompaniyasining bog‘ rekonstruksiyasiga 10 million dollar investitsiya kiritishini aytgan. Sherzod Halimov esa modernizatsiya ikki bosqichda amalga oshirilishi, birinchi bosqichda yozgi bog‘ qayta ta’mirlanishi, ikkinchisida esa yil davomida faoliyat olib boruvchi yopiq o‘yin hududi qurilishini ma’lum qilgan.
Oliy Majlis Senatining 16-dekabr kungi yalpi majlisida poytaxt hokimi Jahongir Ortiqxo‘jayev Toshkentdagi G‘afur G‘ulom bog‘ini 49 yil muddatga ijaraga olgan Singapurning BMP Smart Decision kompaniyasi investitsion majburiyatlarini bajarmaganini ma’lum qilgan edi.
17-dekabr kuni AOKA majlislar zalida Oliy Majlis Senatining 22-yalpi majlisi yakunlari yuzasidan o‘tkazilgan matbuot anjumanida senator Tolibjon Madumarov Toshkentdagi G‘afur G‘ulom bog‘i yuzasidan shartnomalar tuzilmaganini ma’lum qilgan edi. Baxtiyor Sayfullayev esa mazkur masala yuzasidan o‘rganish olib borilishini bildirgandi. “Bundan keyin shahar hokimligining obyektlarni investorlarga berilishi bo‘yicha o‘ylab ish qilishini nazoratimizga olamiz”, — degan edi u.
4-fevral kuni Oliy Majlis Senatida o‘tkazilgan matbuot anjumanida aytilishicha, G‘afur G‘ulom bog‘i masalasi senatorlarning yarim yillik ish rejasiga kiritilgan.
Izoh (0)