Тошкент шаҳри Чилонзор туманида жойлашган Ғафур Ғулом боғи 2022 йил ёз фаслида ташриф буюрувчилар учун очилади. Бу ҳақда туман ҳокимлиги хабар қилди.
Қайд этилишича, BMP Smart Decision корхонасига Ғафур Ғулом номидаги истироҳат боғини тубдан реконструкцияси топширилган. Ҳозирги кунда 4 миллион доллар миқдорида инвестиция киритилган. Умумий режага асосан инвестициялар ҳажми 10 миллион долларга боради.
Реконструкция давомида паркдаги ҳамма аттракционларни янгиланади. 30 та аттракцион масаласида Россия, Хитой, Украина, Туркия корхоналари билан шартномалар тузилган. 90 фоиз аттракцион аллақачон Ўзбекистонга келган, қолгани йўлда.
Паркдаги реконструкция даврида мавжуд 9 минг туп дарахтдан бирортаси ҳам кесилмайди.
«Парк 2022 йил ёзида ишга тушиши кутилмоқда. Бу орқали 400 та ишчи ўрни яратамиз ва кунига 10 минг меҳмон бемалол ҳордиқ чиқариши мумкин бўлади», — дейди корхона масъул ходими.
Ғафур Ғулом боғи 2019 йил 9 августдаги Вазирлар Маҳкамасининг Ф-670 сон фармойиши ҳамда Тошкент шаҳар ҳокимининг 15 августдаги 1126-сон фармойиши асосида (иккала ҳужжат матни ҳам очиқ манбаларга жойлаштирилмаган) BMP Smart Decision’га 49 йилга ижарага берилган. Компания инвестицион мажбуриятлари доирасида боғни жаҳон стандартларига жавоб берадиган қилиб қайта таъмирлаши, эскирган аттракционларни янгисига алмаштириши лозим.
«1980 йилларда ўрнатилган эски аттракционларни янгиларига алмаштириш, шунингдек, боғнинг яшил ҳудудини, боғда ўсаётган Давлат экология ва атроф-муҳитни муҳофаза қилиш қўмитаси хатловидан ўтказилган дарахтларга қўшимча равишда янги дарахтлар билан тўлдиришни ўз ичига олади. Реконструкциядан кейин ҳам боғ ҳудудига кириш аввалгидай бепуллигича қолади», — дея июль бошида Ғафур Ғулом боғи ўрнида янги турар жойлар ва бизнес марказ қурилиши ҳақида тарқалган хабарларни инкор этганди Тошкент шаҳар ҳокимлиги.
Кейинроқ Ғафур Ғулом паркини ижарага олган Сингапур компаниясининг таъсисчиси Ўзбекистон фуқароси, Яккасарой туманида яшовчи Шерзод Ҳалимов экани маълум бўлди
2019 йил сентябрь ойида Тошкент шаҳар ҳокими Жаҳонгир Ортиқхўжаев пойтахт аҳолиси билан учрашиб, Чилонзор туманидаги Ғафур Ғулом номидаги маданият ва истироҳат боғида қандай ўзгаришлар бўлиши ҳақида маълумот берган. Ҳоким боғ реконструкцияси вақтида бирорта дарахт кесилмаслигини айтган, ушбу учрашувда инвестор вакили сифатида Шерзод Ҳалимовнинг ўзи ҳам иштирок этганди.
«Gazeta.uz» нашрининг ёзишича, «Nuz.uz» ушбу учрашув ҳақида хабар қилган (аммо хабар ўчиб кетган, унинг нусхаси «Мy Tashkent.uz»да сақланиб қолган). Чилонзор тумани ҳокими Сарвар Маҳаметов BMP Smart Decision компаниясининг боғ реконструкциясига 10 миллион доллар инвестиция киритишини айтган. Шерзод Ҳалимов эса модернизация икки босқичда амалга оширилиши, биринчи босқичда ёзги боғ қайта таъмирланиши, иккинчисида эса йил давомида фаолият олиб борувчи ёпиқ ўйин ҳудуди қурилишини маълум қилган.
Олий Мажлис Сенатининг 16 декабрь кунги ялпи мажлисида пойтахт ҳокими Жаҳонгир Ортиқхўжаев Тошкентдаги Ғафур Ғулом боғини 49 йил муддатга ижарага олган Сингапурнинг BMP Smart Decision компанияси инвестицион мажбуриятларини бажармаганини маълум қилган эди.
17 декабрь куни АОКА мажлислар залида Олий Мажлис Сенатининг 22-ялпи мажлиси якунлари юзасидан ўтказилган матбуот анжуманида сенатор Толибжон Мадумаров Тошкентдаги Ғафур Ғулом боғи юзасидан шартномалар тузилмаганини маълум қилган эди. Бахтиёр Сайфуллаев эса мазкур масала юзасидан ўрганиш олиб борилишини билдирганди. «Бундан кейин шаҳар ҳокимлигининг объектларни инвесторларга берилиши бўйича ўйлаб иш қилишини назоратимизга оламиз», — деган эди у.
4 февраль куни Олий Мажлис Сенатида ўтказилган матбуот анжуманида айтилишича, Ғафур Ғулом боғи масаласи сенаторларнинг ярим йиллик иш режасига киритилган.
Изоҳ (0)