“Oxirgi marta qachon tibbiy niqob sotib oldingiz?” – “Daryo”da kichik so‘rovnoma

O‘zbekistonga koronavirus kirib kelganidan so‘ng karantin cheklovlari kiritilib, maska rejimi joriy qilingan edi. O‘tgan ikki yil ichida cheklovlar yengillashtirilgan bo‘lsa-da, jamoat joylari va ko‘chada niqobda bo‘lish talabi bekor qilinmadi.

Yanvar oyida kasallanish bo‘yicha antirekordlar kunora yangilandi. Ammo so‘nggi oylarda tibbiy niqobda yurgan odamlarni har qadamda ham uchratavermaysiz.

Odamlar oxirgi marotaba qachon tibbiy niqob sotib olgan? Bu bo‘yicha “Daryo” poytaxtliklar o‘rtasida kichik so‘rovnoma o‘tkazdi.

So‘rovnomada qatnashganlarning deyarli ko‘pchiligi niqob taqmagan. Ammo yonlarida tibbiy niqoblari bor ekanini aytib o‘tdi. Fuqarolarning ta’kidlashicha, niqobni bir olganda zaxira bilan olib qo‘ygan va har kuni sotib olishga hojat yo‘q.

“Bir hafta oldin sotib olganman, almashtirmay foydalanaman. Har kuni sotib olish to‘g‘ri kelmaydi”, — deya qayd etdi sotuvchi ayol.

Taksichining aytishicha, pandemiya boshlanganda olgani bo‘yicha boshqa sotib olmagan, hali ham yetib turibdi.

“Sumkamda bor, men niqobimni yuvib-yuvib ishlataman”, — deydi xaridor ayol.

Ta‘kidlash kerakki, O‘zbekistonda 18-yanvardan buyon kunlik kasallanish holati ming kishidan ortayotgandi. 22-yanvar kuni esa rekord ko‘rsatkichga chiqqandi — bir sutkada 1478 kishida koronavirus aniqlangan. 2-fevralda esa koronavirus bilan kunlik kasallanishlar soni 15 kun ichida ilk bor 1000 tadan kamaygan. 9-fevraldan boshlab mamlakatda koronavirus bilan kunlik kasallanishlar soni bir oy ichida ilk bor 700 tadan kamaydi.