“O‘zbekneftgaz” AJ boshqaruvi raisi Mehriddin Abdullayevning topshirig‘iga asosan, tizimdagi korxonalarda moliyaviy va komplayens nazorati yo‘nalishida korrupsiya, iqtisodiy jinoyatlarga qarshi kurashishga, ularning kelgusida yo‘l qo‘yilishini oldini olishga qaratilgan profilaktik tadbirlar, o‘rganishlar amalga oshirilmoqda.
Xususan, “Buxoro neft bazasi” MChJda 2021-yil yakuni bo‘yicha o‘tkazilgan o‘rganishlarda, jami 22 milliard 58 million so‘mlik xato, kamchiliklar aniqlangan bo‘lib, mazkur holatlarni bartaraf etish, huquqiy baho berish maqsadida huquqni muhofaza qiluvchi organlar bilan hamkorlikda tegishli choralar ko‘rildi.
Biroq mazkur neft bazada o‘tkazilayotgan o‘rganishlar jarayonida yuqorida keltirilgan qonun buzulishlarga qo‘shimcha ravishda yana 5 milliard 506 million so‘mlik manfaatlar to‘qnashuvi, qarindosh urug‘chilik va boshqa turli xato va kamchiliklar, shundan 3 milliard 465 million so‘m mablag‘larni talon-taroj qilish holatlari aniqlandi. Ta’kidlash joizki, mazkur aniqlangan holatlarning asosiy qismi Buxoro neft bazasining sobiq bosh hisobchisi G‘.K.ning bevosita ishtirokida amalga oshirilgan.
Bundan tashqari, neft baza hisob raqamiga kelib tushmagan 330,3 million so‘m pul mablag‘larini hisobchi A.J.ga qarashli korxonaning interaktiv kartasiga qasddan, sun’iy ravishda kiritib, neft mahsulotlari to‘lovsiz berib yuborilgan. Amaldagi qonunchilikka asosan neft mahsulotlari birja savdolari orqali realizatsiya qilinishi belgilangan bo‘lsada, xususiy korxona orqali soxta tiketlar asosida 40,0 million so‘mlik neft mahsulotlari olib chiqib ketilgan.
Sobiq bosh hisobchi G‘.K. tomonidan 1S buxgalteriya elektron hisobotlarda “yaqin do‘sti”ga qarashli korxonadan 917,6 million so‘m, boshqa korxonadan 252,0 million so‘mlik mablag‘ tushganligi to‘g‘risidagi soxta ma’lumotlar kiritish yo‘li bilan neft mahsulotlari o‘zlashtirilgan.
2020-yilning 18-avgust kuni “D” MChJga “ko‘rsatilgan xizmatlar uchun” 250,0 million so‘m pul mablag‘lari o‘tkazib berilgan, 1S buxgalteriya dasturiga Buxoro tovar xomashyo birjasiga neft mahsulotlari uchun mablag‘ o‘tkazilgani to‘g‘risida soxta ma’lumotlar kiritilib, 250,0 million so‘m pul mablag‘lari o‘zlashtirilgan. Amalda esa ushbu korxona bilan Buxoro neft bazasi o‘rtasida xizmat ko‘rsatish bo‘yicha tuzilgan shartnomalari mavjud bo‘lmagan.
55 ta fermer xo‘jaliklaridan to‘lovlar mavjudligi to‘g‘risida 1S buxgalteriya dasturiga soxta ma’lumotlar kiritish yo‘li bilan jami 641,0 million so‘mlik neft mahsulotlarining talon-tarojligiga yo‘l qo‘yilgan.
Sobiq bosh hisobchi tomonidan “Ko‘kcha” filiali boshlig‘i Sh. J. 3 ta iste’molchi tomonidan 430,8 million so‘m to‘lov amalga oshirilgani to‘g‘risida yolg‘on ma’lumotlar berish orqali 430,8 million so‘mlik neft mahsulotlarni to‘lovlarsiz o‘zlashtirgan.
Achinarlisi, sobiq bosh hisobchi ta’sischiligida ochilgan korxonaga to‘g‘ridan to‘g‘ri manfaatlar to‘qnashuviga yo‘l qo‘yilgan holda hech qanday shartnomalar rasmiylashtirmasdan, 2020-yilning avgust—dekabr oylari davomida jami 419,0 million so‘m pul mablag‘lari moliyaviy yordam sifatida o‘tkazib berilgan, shuningdek, 1S buxgalteriya elektron dasturiga mazkur mablag‘larni Buxoro viloyat Tovar xomashyo birjasiga neft mahsulotlari uchun o‘tkazib berilganlik to‘g‘risida soxta ma’lumotlar kiritilib, o‘zlashtirilib yuborilgan.
G‘.K. shaxsiy manfaatdorligi bo‘lgan boshqa korxonaning Buxoro neft bazasi oldidagi 2 milliard 40 million so‘mlik qarzdorlikni undirish bo‘yicha 2020-yil 3-mart kuni iqtisodiy sudning tegishli ijro varaqasini hamda 2020-yil 25-aprel kunidagi majburiy ijro byurosi organlarining ijro ishi yuritishni qo‘zg‘atish to‘g‘risida qarori ijrosini ta’minlamaslik va qarzdorlikni undirmaslik maqsadida, Majburiy ijro byurosining tegishli bo‘linmasiga 2020-yil 24-noyabr kuni qarzdorlikni undirish bo‘yicha ijro ishini to‘xtatishni so‘rab, “Buxoro neft bazasi” MChJ rahbari nomidan soxta ma’lumot kiritgan va bu bilan ijro ishini to‘xtatishga erishgan.
“O‘zbekneftgaz” AJ Moliyaviy va komplayens nazorat departamenti tomonidan o‘tkazilgan o‘rganishlar davomida manfaatlar to‘qnashuviga yo‘l qo‘yilganligi aniqlandi, ya’ni ushbu neft bazada uzoq yillar rahbar va bosh muhandis lavozimlarida ishlagan Z.B.ga qarashli korxonaga 4 540 litr AI-80 markali avtobenzin mahsulotiga to‘lovlar amalga oshirilmagan bo‘lsada berib yuborilgan. O‘rganish kuniga qadar esa undirish choralari mutlaqo ko‘rilmagan.
Aniqlangan holatlar bo‘yicha kamchiliklarni undirish va vaziyatga huquqiy baho berish uchun o‘rganish hujjatlari tegishli tartibda huquqni muhofaza qiluvchi idoralarga taqdim etildi.
“O‘zbekneftgaz” AJ matbuot xizmati
Izoh (0)