Toshkent shahridagi “Koinot” (Kosmonavtlar) majmuasidagi obyektlarda qurilish ishlari boshlangani yo‘q. Bu haqda 15-fevral kuni Yakkasaroy tuman hokimi Anvar Sayfiddinov jurnalistlar bilan bo‘lgan ochiq muloqotda aytib o‘tdi.
Ijtimoiy tarmoqlarda Toshkent shahridagi “Koinot” (Kosmonavtlar) majmuasida Vladimir Janibekov haykali atrofidagi granit plitalar ko‘chirib tashlangani haqida xabar tarqaldi. Shundan so‘ng Madaniy meros agentligi hududning demontaj ishlari ruxsatsiz boshlanganini aniqladi. Agentlik tomonidan maydonni rekonstruksiya qilayotgan Mimar Group kompaniyasi ogohlantirilgani va jarayon to‘xtatilgani ma’lum qilindi.
Anvar Sayfiddinovning aytishicha, maydon o‘tgan asrning 70-yillarda qurilgan va hozirda haykallar atrofi ta’mirtalab holga kelib qolgan.
“Kecha ijtimoiy tarmoqlarda Kosmonavtlar maydoni buzilmoqda, madaniy meros obyektiga zarar yetmoqda, degan xabarlar tarqaldi. Aslida unday emas. Loyihaga ko‘ra, ikkala obyekt ham joyida qoladi, ularga tegilmaydi. Faqatgina atrofini zamonaviy ko‘rinishga keltirish uchun ta’mirlash ishlari olib boriladi. Uning rangi, ishlatilayotgan marmarlar va qurilish materiallari Madaniy meros agentligi bilan birgalikda muhokama qilinyapti”, — dedi tuman rahbari.
Hokimning ta’kidlashicha, plitalarni ko‘chirish ishlari to‘xtatilgan.
“Madaniy meros obyektlarini muhofaza qilish agentligi kengashidan ruxsat olinmagani uchun ishlar to‘xtatildi. Hozir ruxsat olish ishlari rasmiylashtirilmoqda. Hech kim hech narsani buzayotgani yo‘q. Eski, abgor toshlarni joyidan qo‘zg‘atishdi. Hali qurilish ishlari boshlangani yo‘q, faqatgina tayyorgarlik ketmoqda. Bu yerni Toshkent shahar hokimligi ta’mirlamoqchi. Ishlar rasmiy tasdiqlangan loyiha asosida qilinadi. Taklif ommaga yoqqanidan keyin hujjatlar tayyorlanadi. To‘g‘ri tushunishimiz kerakki, texnik tomondan hujjatlarni tayyorlash ko‘p vaqt oladi. Bir kunda yoki 1 soatda bitmaydi bu hujjatlar. Buni ta’mirlash ishlari bilan parallel olib boramiz. Chunki tayyorgarlikka ham ko‘p vaqt kerak. Lekin hech bir ishni noqonuniy boshlamaymiz. Hamma hujjatlar tasdiqlangandan keyin boshlanadi. Bahor kelyapti. Agar hamma hujjatni nuqta verguligacha qiladigan bo‘lsak, yarim yillab vaqt o‘tib ketadi. Yoz ham o‘tib ketishi mumkin. Bu narsa yozda kerak-ku”, — dedi Yakkasaroy tumani hokimi.
Uning qo‘shimcha qilishicha, loyiha bitishiga 2 oycha vaqt ketishi mumkin.
“Daryo” muxbiri holatni o‘rganish maqsadida voqea joyida bo‘ldi. O‘rganishlar natijasida Madaniy meros agentligi va Anvar Sayfiddinov aytgan gaplar tasdig‘ini topmadi. Haykallar atrofida ko‘chirilgan plitalarni maydondan olib chiqib ketilayotgani, ya’ni ishlar to‘xtatilmagani ma’lum bo‘ldi.
Ma’lumot uchun, 1984-yilda ochilgan Kosmonavtlar maydoni monumental san’at yodgorliklari ro‘yxatiga kiritilgan va (hukumatning 2019-yil 4-oktabrdagi qarori bilan) davlat muhofazasiga olingan. Qonunchilikka muvofiq, madaniy va moddiy meros obyektlarida qurilish, ta’mirlash va restavratsiya ishlarini faqat Madaniy meros agentligi huzuridagi Ilmiy-ekspert kengashi tasdiqlaganidan keyin amalga oshirishga ruxsat beriladi. Yuqoridagi holatda esa demontaj ishlariga bu kabi ruxsat olinmagan. Toshkent shahri va Yakkasaroy tumani hokimliklari qurilish ishlari boshlanishi haqida hech qanday xabar e’lon qilmagan.
Izoh (0)