“Tolibon” harakati Tojikiston va O‘zbekiston bilan chegaradosh bo‘lgan viloyatlariga zamonaviy qurol hamda texnika bilan qurollangan 10 ming harbiysini yuborishi haqida xabar qilingandi. Telegram’dagi “Nigoh” kanalining ma’lum qilishicha, “Interfaks” tarqatgan ushbu xabar asossiz.
Qayd etilishicha, “Interfaks” xabarga “Tolibon” Qurolli kuchlari bosh shtabi rahbari Qori Fasihuddin Fitratning Twitter sahifasidagi postni asos qilib olgan.
“Manbalarimizga ko‘ra, bu xabar yolg‘on, chegaramiz tomon hech qanday qo‘shinlarning harakati kuzatilayotgani yo‘q”, — deyiladi “Nigoh” kanali xabarida.
Bundan tashqari, 2021-yilning dekabr oyida harakat vakillari Fitratga tegishliligi aytilgan Twitter’dagi sahifa soxta ekani haqida xabar bergan.
Eslatib o‘tamiz, 2021-yil avgust oyida hokimiyatni egallagan “Tolibon” harakatining yuqori lavozimli a’zosi Vahidulla Hoshimiy Afg‘oniston demokratik davlatga aylanmasligi, unda shariat qonunlari amal qilishini aytgandi. Uning so‘zlariga ko‘ra, Afg‘onistonda hokimiyat tuzilmasi “Tolibon” hukmronligining avvalgi davri: 1996—2001-yillardagi davlat tuzilishiga o‘xshash bo‘ladi.
Sentabr o‘rtalarida “Tolibon” Ayollar masalalari bo‘yicha vazirlikni tugatib, uning o‘rniga Saxovatni targ‘ib qilish va illatlarni yo‘qotish vazirligini tuzgani, dekabr oyida Afg‘oniston milliy armiyasini shakllantirishga kirishgani haqida xabar berilgandi.
Izoh (0)