«Толибон» ҳаракати Тожикистон ва Ўзбекистон билан чегарадош бўлган вилоятларига замонавий қурол ҳамда техника билан қуролланган 10 минг ҳарбийсини юбориши ҳақида хабар қилинганди. Telegram’даги «Нигоҳ» каналининг маълум қилишича, «Интерфакс» тарқатган ушбу хабар асоссиз.
Қайд этилишича, «Интерфакс» хабарга «Толибон» Қуролли кучлари бош штаби раҳбари Қори Фасиҳуддин Фитратнинг Twitter саҳифасидаги постни асос қилиб олган.
«Манбаларимизга кўра, бу хабар ёлғон, чегарамиз томон ҳеч қандай қўшинларнинг ҳаракати кузатилаётгани йўқ», — дейилади «Нигоҳ» канали хабарида.
Бундан ташқари, 2021 йилнинг декабрь ойида ҳаракат вакиллари Фитратга тегишлилиги айтилган Twitter’даги саҳифа сохта экани ҳақида хабар берган.
Эслатиб ўтамиз, 2021 йил август ойида ҳокимиятни эгаллаган «Толибон» ҳаракатининг юқори лавозимли аъзоси Ваҳидулла Ҳошимий Афғонистон демократик давлатга айланмаслиги, унда шариат қонунлари амал қилишини айтганди. Унинг сўзларига кўра, Афғонистонда ҳокимият тузилмаси «Толибон» ҳукмронлигининг аввалги даври: 1996—2001 йиллардаги давлат тузилишига ўхшаш бўлади.
Сентябрь ўрталарида «Толибон» Аёллар масалалари бўйича вазирликни тугатиб, унинг ўрнига Саховатни тарғиб қилиш ва иллатларни йўқотиш вазирлигини тузгани, декабрь ойида Афғонистон миллий армиясини шакллантиришга киришгани ҳақида хабар берилганди.
Изоҳ (0)