Prezident Shavkat Mirziyoyev raisligida 2022-yilning 11-fevralida bo‘lib o‘tgan videoselektor yig‘ilishida yo‘l harakati xavfsizligini ta’minlash o‘ta muhim va kechiktirib bo‘lmas masala sifatida o‘rtaga tashlangani, yig‘ilishda bir necha hokimlar qatori Samarqand viloyatining Urgut tumani hokimi ham ishdan olinib, uch oy sinov muddati berilgani xabar qilingandi. “Daryo” muxbiri Farhod Norbo‘tayev Urgut tuman hokimi Botir Jabborov bilan suhbatlashib, tanqiddan qilingan xulosa va muammoni bartaraf etish maqsadida qilinayotgan rejalari haqida so‘radi.
“Davlatimiz rahbarining aytgan gaplari davlat xizmatida bo‘lgan barcha mas’ul xodimlar kabi bizni ham chuqur mulohazaga, bundan tegishli xulosalar chiqarishga undadi. Xususan, Urgut tumanida sodir etilgan avtohalokatlar natijasida 28 nafar odam hayotdan bevaqt ko‘z yumishi, ularning yetti nafari yosh bola ekani juda achinarli hol, albatta. O‘lim bilan bog‘liq holatlarni tahlil qilganimizda, ushbu yo‘l-transport vositalari tuman hududidan o‘tgan M-39 Toshkent—Termiz xalqaro ahamiyatga ega avtomobil yo‘lining 1102-kilometridan 1105-kilometrigacha bo‘lgan avariya o‘chog‘iga aylangan hududda qarama-qarshi yo‘lga chiqib ketish va to‘qnashish natijasida sodir etilayotgani ma’lum bo‘ldi”, — deydi tuman hokimi Botir Jabborov.
Hokimning ta’kidlashicha, 4R47 Bulung‘ur—Urgut avtomobil yo‘lining 60-kilometridan 80-kilometrigacha bo‘lgan hududda yo‘llarning tekis va ravonligi sababli tezlikni me’yoridan oshirish, qarama-qarshi yo‘nalishga chiqib ketish holatlari ko‘p kuzatilgan. Buning natijasida kunning tungi vaqtlarida piyodani urib yuborish holatlari ko‘paygan. Shu hisobga olinib mazkur yo‘lning Urgut savdo kompleksigacha bo‘lgan olti kilometr qismida hokimlik tashabbusi bilan 130 dona yangi tayanch ustunga ikki donadan yoritish chiroqlari o‘rnatilgan. Mazkur yo‘l tuman markaziga eltuvchi asosiy yo‘l ekanligi hisobga olinib, “Dehqonobod” mahallasida joylashgan dehqon bozori atrofida ham 40 dona tayanch ustuniga yoritish moslamalari o‘rnatilgan.
2021-yil yakunida Urgut tumanida 1 milliard 800 million so‘m evaziga situatsion markaz ishga tushirilib, 58 ta kuzatuv kamerasi o‘rnatilgan. Shundan 10 tasi yo‘l harakati qoidalari buzilishini qayd etuvchi kamera bo‘lsa, bittasi avariya o‘chog‘i bo‘lgan 4R47 avtomobil yo‘lidagi tezlikni o‘lchovchi fotoradar hisoblanadi. Bundan tashqari yil davomida piyodalar va haydovchilar harakati xavfsizligini ta’minlash maqsadida uchta serqatnov joyga svetofor o‘rnatilgan. Tumanning barcha serqatnov bo‘lgan yo‘l yoqalariga velo va piyodalar yo‘lakchalari tashkil etilgan. Mahallalardagi uch kilometr yo‘lga 600 dona beton to‘siq o‘rnatilgach, ushbu hududda birorta ham yo‘l transport hodisasi sodir etilmagan.
“Tumandagi jami olti nafar YPX xodimi hozirgi kunda ikki smenada xizmat olib borishiga qaramasdan, yo‘llarni to‘liq qamrab olish imkoniyati bo‘lmayapti. Shu sababli mahalliy budjet hisobidan to‘rtta sektorga bir nafardan YPX xodimini shartnoma asosida ishga qabul qilishni rejalashtirganmiz. Ularning oylik maoshi mahalliy budjet hisobidan to‘lab beriladi”, — deydi Botir Jabborov.
Botir Jabborovning ta’kidlashicha, endilikda tuman IIB mas’ul rahbarlari va YHXB boshliqlari har oyda Xalq deputatlari Urgut tuman kengashida qilingan ishlar bo‘yicha hisobot berib boradi.
Izoh (0)