Toshkent shahri ko‘chalarini tartibga keltirish va veloyo‘laklarni yanada ko‘paytirish maqsadida Yakkasaroy tumanining Bobur ko‘chasida ham yo‘l ta’mirlash ishlari boshlandi, deb xabar beradi poytaxt hokimligi matbuot xizmati.
Rejaga muvofiq, Islom Karimov va Bobur ko‘chasi kesishmasidan Bobur ko‘chasi bo‘ylab Bobur va Nukus ko‘chalari kesishmasigacha bo‘lgan oraliqda veloyo‘lak barpo etiladi.
Shuningdek, avtomobillar qatnov qismining o‘rtasida bordyurlar bilan mustahkamlangan yashil maydonlar tashkil qilinadi. Ta’mirlash ishlari jarayonida qatnov qismining bitta yo‘lagi qisman yopilishi mumkin.
Toshkent shahar hokimligi noqulayliklar uchun uzr so‘raydi.
Eslatib o‘tamiz, 2021-yilning sentabrida “Velosportni rivojlantirishga doir kompleks chora-tadbirlar to‘g‘risida”gi prezident qarori qabul qilingandi. Qarorga ko‘ra, Velosport turlarini 2021–2022-yillarda rivojlantirish dasturi tasdiqlangan. 2022/2023-o‘quv yilidan quyidagilar tashkil etiladi:
- Turizm va sport vazirligi tizimiga kiradigan Respublika velosport mahorat maktab-internati;
- qo‘shimcha 25 ta bolalar-o‘smirlar sport maktablarida hamda sportning o‘yin turlari va yengil atletikaga ixtisoslashtirilgan bolalar-o‘smirlar sport maktablarida velosport turlari bo‘yicha bo‘limlar;
- Buxoro, Qarshi, Navoiy va Termiz olimpiya zaxiralari kollejlarida velosport turlari bo‘yicha bo‘limlar.
Izoh (0)