Andijon viloyatining Marhamat tumanidagi 72-ixtisoslashtirilgan davlat umumta’lim maktabidagi uzrbozlik ortidan tuman hokimi o‘rinbosari ishdan olindi. Hokimga esa hayfsan berildi. Bu haqda viloyat hokimi Shuhrat Abdurahmonov raisligida 14-fevral kuni o‘tkazilgan hokimlik soatida ma’lum qilingan, deya xabar berdi “Daryo” muxbiri.
“Daryo” manbasiga ko‘ra, Shuhrat Abdurahmonov hokimlik soatida Marhamat tumanidagi holatga alohida to‘xtalib, Marhamat tumani hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Muxtor Qurbonov ishdan olinganini, tuman hokimi Bobur Yo‘ldoshevga hayfsan intizomiy jazosi qo‘llanib, olti oy davomida hech qanday rag‘bat pullari berilmasligini ma’lum qilgan.
“Viloyat rahbari tuman xalq ta’limi bo‘limi mudiri ishi bo‘yicha Xalq ta’limi vaziri shug‘ullanayotganini, mudirga qanday chora ko‘rilishini vazirlik hal etishini aytib, barcha shahar va tuman hokimlariga bunday holat qayta takrorlanmasligi lozimligini uqtirdi”, — deydi “Daryo” muxbiri bilan suhbatlashgan manba.
Marhamatdagi uzrbozlik ortidan jurnalistik surishtiruv olib borgan “Daryo” muxbiri bilan suhbatlashganlar, jumladan, maktab direktori ham yoppasiga uzr so‘rash tashabbusi shaxsan hokim Boburjon Yo‘ldoshevga tegishli ekanini bildirgandi.
2022-yilning 8-fevral kuni Andijon viloyatining Marhamat tumanidagi maktabda o‘qituvchilar o‘quvchilarning o‘zlashtirishi qoniqarsizligi sabab ota-onalardan uzr so‘ragani aytilgan xabar e’lon qilindi. Holat keng jamoatchilik muhokamasiga sabab bo‘ldi. Xususan, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov “Shuhrat Abdurahmonovning shaxsan o‘zi barcha ustozlardan uzr so‘rashi kerak”ligini yozdi. Xalq ta’limi vaziri ham holatga munosabat bildirib, o‘qituvchilarning sha’nini yerga urishni davlat siyosatiga qarshi harakat deb baholashini bildirdi. Holatni izohlagan tuman hokimligi o‘tkazilgan tadbir ijtimoiy tarmoqlarda boshqacha talqin qilinganini yozdi. Andijon viloyati hokimi Shuhrat Abdurahmonov ham ushbu holatga munosabat bildirib, “xatoga yo‘l qo‘ygan har qanday rahbarga qonunda belgilangan jazo choralarini ko‘rilishini ta’minlanishini” ta’kidladi. So‘ngra viloyat xalq ta’limi boshqarmasi boshlig‘i va Marhamat tumani hokimi o‘qituvchilardan uzr so‘radi. XTVning ma’lum qilishicha, holat yuzasidan o‘rganish natijalariga qonuniy baho berish uchun hujjatlar Bosh prokuraturaga yuborilgan.
12 fevral kuni Xalq ta’limi vaziri Baxtiyor Saidov tumandagi uzr so‘rashga majburlangan o‘qituvchilar bilan uchrashdi.
Izoh (0)