Президент Шавкат Мирзиёев раислигида 2022 йилнинг 11 февралида бўлиб ўтган видеоселектор йиғилишида йўл ҳаракати хавфсизлигини таъминлаш ўта муҳим ва кечиктириб бўлмас масала сифатида ўртага ташлангани, йиғилишда бир неча ҳокимлар қатори Самарқанд вилоятининг Ургут тумани ҳокими ҳам ишдан олиниб, уч ой синов муддати берилгани хабар қилинганди. «Дарё» мухбири Фарҳод Норбўтаев Ургут туман ҳокими Ботир Жабборов билан суҳбатлашиб, танқиддан қилинган хулоса ва муаммони бартараф этиш мақсадида қилинаётган режалари ҳақида сўради.
«Давлатимиз раҳбарининг айтган гаплари давлат хизматида бўлган барча масъул ходимлар каби бизни ҳам чуқур мулоҳазага, бундан тегишли хулосалар чиқаришга ундади. Хусусан, Ургут туманида содир этилган автоҳалокатлар натижасида 28 нафар одам ҳаётдан бевақт кўз юмиши, уларнинг етти нафари ёш бола экани жуда ачинарли ҳол, албатта. Ўлим билан боғлиқ ҳолатларни таҳлил қилганимизда, ушбу йўл-транспорт воситалари туман ҳудудидан ўтган М-39 Тошкент—Термиз халқаро аҳамиятга эга автомобиль йўлининг 1102-километридан 1105-километригача бўлган авария ўчоғига айланган ҳудудда қарама-қарши йўлга чиқиб кетиш ва тўқнашиш натижасида содир этилаётгани маълум бўлди», — дейди туман ҳокими Ботир Жабборов.
Ҳокимнинг таъкидлашича, 4R47 Булунғур—Ургут автомобиль йўлининг 60-километридан 80-километригача бўлган ҳудудда йўлларнинг текис ва равонлиги сабабли тезликни меъёридан ошириш, қарама-қарши йўналишга чиқиб кетиш ҳолатлари кўп кузатилган. Бунинг натижасида куннинг тунги вақтларида пиёдани уриб юбориш ҳолатлари кўпайган. Шу ҳисобга олиниб мазкур йўлнинг Ургут савдо комплексигача бўлган олти километр қисмида ҳокимлик ташаббуси билан 130 дона янги таянч устунга икки донадан ёритиш чироқлари ўрнатилган. Мазкур йўл туман марказига элтувчи асосий йўл эканлиги ҳисобга олиниб, «Деҳқонобод» маҳалласида жойлашган деҳқон бозори атрофида ҳам 40 дона таянч устунига ёритиш мосламалари ўрнатилган.
2021 йил якунида Ургут туманида 1 миллиард 800 миллион сўм эвазига ситуацион марказ ишга туширилиб, 58 та кузатув камераси ўрнатилган. Шундан 10 таси йўл ҳаракати қоидалари бузилишини қайд этувчи камера бўлса, биттаси авария ўчоғи бўлган 4R47 автомобиль йўлидаги тезликни ўлчовчи фоторадар ҳисобланади. Бундан ташқари йил давомида пиёдалар ва ҳайдовчилар ҳаракати хавфсизлигини таъминлаш мақсадида учта серқатнов жойга светофор ўрнатилган. Туманнинг барча серқатнов бўлган йўл ёқаларига вело ва пиёдалар йўлакчалари ташкил этилган. Маҳаллалардаги уч километр йўлга 600 дона бетон тўсиқ ўрнатилгач, ушбу ҳудудда бирорта ҳам йўл транспорт ҳодисаси содир этилмаган.
«Тумандаги жами олти нафар ЙПХ ходими ҳозирги кунда икки сменада хизмат олиб боришига қарамасдан, йўлларни тўлиқ қамраб олиш имконияти бўлмаяпти. Шу сабабли маҳаллий бюджет ҳисобидан тўртта секторга бир нафардан ЙПХ ходимини шартнома асосида ишга қабул қилишни режалаштирганмиз. Уларнинг ойлик маоши маҳаллий бюджет ҳисобидан тўлаб берилади», — дейди Ботир Жабборов.
Ботир Жабборовнинг таъкидлашича, эндиликда туман ИИБ масъул раҳбарлари ва ЙҲХБ бошлиқлари ҳар ойда Халқ депутатлари Ургут туман кенгашида қилинган ишлар бўйича ҳисобот бериб боради.
Изоҳ (0)