Germaniyaning sobiq kansleri Angela Merkel prezident Frank-Valter Shtaynmayer qayta saylangan qurultoyda lavozimini tark etganidan beri birinchi marta ommaga ko‘rinish berdi, deb yozadi DW.
Federal qurultoyda qatnashgan 1437 nafar delegat Angela Merkelni qarsaklar bilan kutib olgan. Ta’kidlanishicha, bu uning 2021-yilning dekabrida o‘z lavozimi Olaf Sholsga topshirganidan beri ilk bor omma oldiga chiqishi hisoblanadi.
Germaniyaning amaldagi prezidenti Frank-Valter Shtaynmayer ikkinchi muddatga saylandi. 66 yoshli siyosatchiga delegatlarning 1045 nafari ovoz bergan.
Saylovlarda Shtaynmayerdan tashqari, “Germaniya Xristian-demokratlar ittifoqi”dan Gerxard Trabert, “Germaniya uchun muqobil” partiyasidan Maks Otte va “Erkin saylovchilar”dan fizik Stefani Gebauer ishtirok etgan. Trabert 96 ta, Gebaues — 58 ta, Otte — 140 ta ovoz yig‘ishga muvaffaq bo‘lgan. 12 ta ovoz haqiqiy emas deb topilgan, 86 tasi ovoz bermagan.
Nashrning qayd etishicha, Merkel kanslerlik lavozimidan ketganidan buyon ikki oy davomida omma oldida ko‘rinish bermagani Germaniyada unga nisbatan e’tiborning yanada ortishiga sabab bo‘lgan. U Xristian-demokratik ittifoq partiyasining virtual konferensiyalarida ham qatnashmaslikka qaror qilgan. Shuningdek, Merkel BMTda global jamoatchilik farovonligi bo‘yicha yuqori darajadagi maslahat organiga raislik qilishni taklifini rad etgan.
Bundestag raisi Berbel Bass Germaniya sobiq kanslerini uzoq yillar davomida mamlakatga qilgan xizmatlari uchun minnatdorchilik bildirgan. “Hurmatli doktor Merkel xonim, men sizni federal yig‘inining barcha a’zolari nomidan tabriklayman”, — deydi Bass qarsaklar avvalida.
31 yillik ish stajiga ega Merkel 15 ming yevroga yaqin nafaqa oladi — bu Vazirlar Mahkamasidagi moashning 65 foizi hisoblanadi. Germaniya hukumatining barcha sobiq rahbarlari va Germaniya prezidentlari singari, Merkelda ham o‘z ofisiga va kichik shtat xodimlariga, jumladan, ofis menejeri, ikkita yordamchi, kotib va haydovchiga ega bo‘lish huquqi mavjud.
Izoh (0)