Olaf Shols Bundestagda ko‘pchilik ovoz bilan rasman Germaniyaning yangi kansleri etib saylandi, deb yozadi Der Spiegel.

Sholsga 395 nafar deputat ovoz berdi, saylanish uchun unga 369 ta ovoz zarur edi. 8-dekabr kunining o‘zida Olaf Shols kansler sifatida qasamyod qiladi. Olaf Shols Germaniyaning to‘qqizinchi federal kansleriga aylandi. U ushbu lavozimda Germaniya hukumatini 16 yil boshqargan Angela Merkelning o‘rnini egalladi.

Shols saylanganidan keyin Germaniya kansleri veb-saytining domen nomi bundeskanzlerin.de’dan bundeskanzler.de’ga o‘zgartirildi.

Olaf Shols 63 yoshda, u Germaniya sotsial-demokratik partiyasi a’zosi. So‘nggi uch yil davomida u Merkel hukumatida vitse-kansler va moliya vaziri lavozimlarida ishlagan. 2011—2018-yillarda Olaf Shols Gamburg shahrining rahbari sifatida faoliyat ko‘rsatgan.

Germaniyada 27-sentabr kuni bo‘lib o‘tgan  parlament saylovlarida moliya vaziri Olaf Shols rahbarligidagi Sotsial-demokratik partiya (GSDP) g‘alaba qozongandi. Unga saylovchilarning 25,7 foizi ovoz bergan. Yangi hukumatni tuzishda Sotsial-demokratik partiyadan tashqari “Yashillar” va Erkin demokratik partiyaning ishtiroki zarur edi. Uchala partiya rahbarlari, 7-dekabr kuni nihoyat koalitsiya shartnomasini imzoladi.