12-fevral kuni Rossiya Tinch okeani floti (TOF) kuchlarining rejalashtirilgan mashg‘ulotlari o‘tkazilayotgan Kuril orollarining Urup hududida AQSh harbiy-dengiz kuchlarining “Virjiniya” toifasidagi suvosti kemasi paydo bo‘ldi. Bu haqda Rossiya Federatsiyasi Mudofaa vazirligi xabar berdi.
Suvosti kemasi ekipajiga ovozli suvosti aloqasi rejimida rus va ingliz tillarida ogohlantirish xabari yuborilgan: “Siz Rossiyaning hududiy suvlaridasiz. Darhol keting!”
Ekipaj so‘rovni e’tiborsiz qoldirgan, shuning uchun Rossiyaning “Marshal Shaposhnikov” fregati “tegishli vositalarni” qo‘llagan. Mudofaa vazirligi bu vositalar nima ekanini ochiqlamadi.
“Amerika suvosti kemasi o‘ziyurar imitator orqali radiolokatsion va akustik nazorat vositalaridagi nishonlarni ikkita qilib ko‘rsatuvchi vositani qo‘llagan hamda Rossiya Federatsiyasining hududiy suvlarini maksimal tezlikda tark etdi”, — deyiladi xabarda.
Ushbu voqea tufayli Moskvadagi AQSh elchixonasi mudofaa attashesi Rossiya Mudofaa vazirligiga chaqirilgan. Unga Amerika suvosti kemasi xalqaro huquqni qo‘pol ravishda buzgani va Rossiya Federatsiyasining milliy xavfsizligiga tahdid solayotgani haqida nota topshirilgan.
“Rossiya Mudofaa vazirligi AQSh kelajakda bunday holatlarning oldini olishi zarurligini ta’kidlaydi. Rossiya Mudofaa vazirligi o‘zining hududiy dengizida Rossiya Federatsiyasi xavfsizligini ta’minlash uchun barcha choralarni ko‘rish huquqini o‘zida saqlab qoladi”, — deyiladi xabarda.
AQShning Hind-Tinch okeani qo‘mondonligi matbuot kotibi Kayl Reyns Amerika suvosti kemasi Rossiya hududiy suvlarida harakat qilgani haqidagi Moskvaning xabarlarini rad etdi. U Amerika suvosti kemalarining aniq joylashuvini aytishdan bosh tortdi, biroq ular “xalqaro suvlarda xavfsiz harakat qilishini” qayd etdi.
2021-yilning iyun oyida Rossiya Mudofaa vazirligi Britaniyaning Defender esminetsi Qora dengizda Rossiya chegarasini buzib kirganini e’lon qilgandi. Vazirlik ma’lumotlariga ko‘ra, Rossiya qirg‘oq qo‘riqlash kemasi ogohlantiruvchi o‘q ochgan, Su-24M samolyoti esa esminetsga “ogohlantirish bombardimonini” amalga oshirgan, shundan so‘ng Defender Rossiya hududiy suvlarini tark etgandi.
Britaniya Mudofaa vazirligi esminetsga bombalar tashlanganini rad etdi. Vazirlik kema Ukraina hududiy suvlaridan chiqmagani va xalqaro qonunlarga zid harakat qilmaganini ta’kidlagan.
Voqea tufayli Britaniyaning Moskvadagi elchisi Rossiya Tashqi ishlar vazirligiga chaqirilgandi.
Izoh (0)