Yamanlik isyonchilar yanvar oyida Birlashgan Arab Amirliklari va AQSh harbiylarini xavfga qo‘ygan bir qator hujumlar uyushtirganidan so‘ng, 12-fevral kuni AQSh harbiy-havo kuchlarining F-22 qiruvchi samolyotlari guruhi BAAga keltirildi. Bu haqda Al-Arabiya telekanaliga tayanib, “Interfaks” xabar berdi.
AQSh harbiy-havo kuchlari bayonotiga ko‘ra, qiruvchi samolyotlarning keltirilishi Vashingtonning BAAni har tomonlama qo‘llab-quvvatlashidan yana bir dalolat. Qayd etilishicha, qiruvchilarni yuborish buyrug‘ini Pentagon rahbari Lloyd Ostin bergan bo‘lib, u mazkur qarorni Abu-Dabi valiahd shahzodasi Muhammad bin Zayid Al Nahayon bilan birgalikda muvofiqlashtirgan.
Samolyotlar BAAga AQShning Virjiniya shtatidagi “Lengli” havo kuchlari bazasidan kelgan.
Yanvar oyida Yamanning Eron tomonidan qo‘llab-quvvatlangan xusiy isyonchilari BAAdagi nishonlarga bir qator hujumlar uyushtirdi, ular muvaffaqiyatsiz tugadi. Natijada, BAA va Qo‘shma Shtatlar isyonchilarning raketa va dronlarini tutib olish uchun havo hujumidan mudofaa tizimlarini joylashtirdi, BAAdagi amerikalik harbiylar esa kulbalarni boshpana qilishga majbur bo‘ldi.
Yamandagi qurolli mojaro 2014-yilning martidan beri davom etmoqda. Saudiya Arabistoni boshchiligidagi arab koalitsiyasi Yaman prezidenti Abdu Rabbo Mansur Hodiy qo‘shinlarini mamlakatning bir qismini nazorat qilayotgan xusiy isyonchilarga qarshi kurashda qo‘llab-quvvatlamoqda. G‘arbning fikricha, isyonchilarga Eron yordam bermoqda.
Izoh (0)