BMT bosh kotibi Antoniu Guterrish Germaniya sobiq kansleri Angela Merkelga butun insoniyatga foyda keltiradigan global jamoachilik farovonligi bo‘yicha yuqori darajadagi maslahat organiga raislik qilishni taklif etdi. Bu haqda Spiegel nashri BMTdagi manbalariga tayanib, xabar berdi.
Ma’lum qilinishicha, Guterrish Merkelga taklifni maktub ko‘rinishida yuborgan va hozirda javob kelmagan. Ammo tashkilotning o‘zidagilar sobiq kansler ish borasidagi taklifni qabul qilishiga shubha bildirmoqda.
BMT global jamoachilik farovonligi deganda, xususan, global sog‘liqni saqlash, ilm-fan, tinchlikni ta’minlash, tabiatni muhofaza qilish, jahon iqtisodiyotini tushunadi.
Nashr ma’lumotlariga ko‘ra, Merkel ushbu taklifga rad javobini bergudek bo‘lsa, unga BMTning iqlim bo‘yicha rahbari lavozimi taklif etishi mumkin. Chunki BMTning iqlim o‘zgarishi bo‘yicha doiraviy konvensiyasi ijrochi kotibi Patrisiya Espinozaning vakolatlari 2022-yilning yozida tugaydi.
Avvalroq Merkel iste’foga chiqqanidan keyin ma’lum vaqt dam olishi, keyin xayoliga kelgan ish bilan shug‘ullanishi haqida gapirgandi. Shu bilan birga, u siyosat bilan boshqa shug‘ullanmasligini ma’lum qilgandi.
Mavzuga doir: Germaniya Angela Merkelni kansler lavozimidan kuzatdi. Uning sharafiga tantanali marosim bo‘lib o‘tdi
27-sentabr kuni bo‘lib o‘tgan Germaniyadagi parlament saylovlarida amaldagi moliya vaziri Olaf Shols rahbarligidagi Sotsial-demokratik partiya (GSDP) g‘alaba qozondi. Unga saylovchilarning 25,7 foizi ovoz berdi, ushbu natijaga muvofiq u yangi Bundestagda 206 ta o‘ringa ega bo‘ladi. 26-oktabr kuni Germaniya prezidenti Frank-Valter Shtaynmayer Merkelga hukumat rahbari sifatidagi muddati rasman tugagani to‘g‘risidagi maktubni topshirdi.