AQSh prezidenti Jo Bayden Ukrainadagi amerikaliklarga murojaat qilib, ularni mamlakatni “hoziroq” tark etishga chaqirdi. Bu haqda u NBC telekanaliga bergan intervyusida ma’lum qilgan.
“Amerika fuqarolari hoziroq ketgani ma’qul… Biz terrorchilik tashkilotiga qarshi kurashmayapmiz, ammo dunyodagi eng yirik armiyalardan biri haqida gap ketyapti. Bu umuman boshqa masala va vaziyat juda tez nazoratdan chiqib ketishi mumkin”, — deydi u.
Bayden bilan suhbatlashgan muxbir Lester Xolt prezidentdan qanday holatda AQSh Ukrainaga o‘z fuqarolarini evakuatsiya qilish uchun qo‘shin yuboradi, deya savol bergan. “Hech qanday holatda. Amerikaliklar va ruslar bir-biriga qarshi o‘q uza boshlasa, bu jahon urushi bo‘ladi”, — deydi Bayden.
Shuningdek, 10-fevral kuni Davlat departamenti AQSh fuqarolarini “Rossiya harbiy harakatlarining xavfi ortib borayotgani va COVID-19” sabab Ukrainaga bormaslikka chaqirib, yana bir ogohlantirish chiqargan edi. Ayni vaqtda Ukrainada bo‘lib turgan amerikaliklarga esa tijoriy yoki shaxsiy transportda zudlik bilan mamlakatni tark etish tavsiya etilgan.
“Agarda Ukrainada qoladigan bo‘lsangiz, Rossiya tomonidan amalga oshirilishi mumkin bo‘lgan harbiy harakatlardan, ehtimoliy jinoyatchilik, tartibsizlik va potensial harbiy ziddiyatlarda yuqori darajada ehtiyotkorlikka rioya qiling. Ayrim hududlar xavf darajasi yuqori bo‘lgan zonalar hisoblanadi”, — deyiladi Davlat departamenti xabarida.
Eslatib o‘tamiz, 24-yanvar kuni AQSh Davlat departamenti Amerikaning Kiyevdagi elchixonasi xodimlarining bir qismini, oilalarini esa to‘liq evakuatsiya qilmoqchiligini ma’lum qildi. Bundan tashqari, Davlat departamenti AQSh fuqarolarini Ukrainani tark etishga chaqirdi. Buyuk Britaniya va Avstraliya ham Kiyevdagi diplomatlarining oilalarini evakuatsiya qilishni boshladi.
Vladimir Zelenskiy avval ham ikki marta ukrainaliklarga Rossiya bosqinining ehtimoli yuzasidan murojaat qilgan. U xalqini vahimaga berilmaslikka chaqirgan.
Izoh (0)