Buyuk Britaniya tashqi ishlar vaziri Liz Trass COVID-19 bilan kasallangani tufayli Moskvaga rejadagi muddatdan ikki haftaga kechikib yetib keldi. U tashrifning birinchi kunida Alesandr bog‘ida bo‘ldi va Rossiya TIV rahbari Sergey Lavrov bilan uchrashdi. Bu haqda Reuters agentligi xabar berdi.
Xabarga ko‘ra, Buyuk Britaniya tashqi ishlar vaziri Liz Trass Moskvaga qilgan tashrifining birinchi kunida shahardagi noma’lum askar qabriga gulchambar qo‘ygan va Aleksandr bog‘ida uni Kreml harbiy komendanti qarshi olgan.
Tashrif maqsadlari haqida Trass xonim ma’lum vaqt avval Twitter’da shunday yozgandi: “Shu haftada Moskvada bo‘laman va Ukraina bilan urush Rossiya, Yevropa xavfsizligi uchun falokatli oqibatlar keltirishi mumkinligi haqida qat’iy ogohlantiraman”.
Qayd etilishicha, Buyuk Britaniya TIV rahbari Sergey Lavrov bilan uchrashuvda ham tvitida qayd etgan masalalariga yana to‘xtalib o‘tgan.
“Haqiqat shundaki, biz Rossiyaning Ukraina chegarasi yaqiniga 100 ming kishilik harbiylar guruhini joylashtirganini inkor eta olmaymiz. Bu Ukraina suverenitetini buzishga, uning chegaralarini kesib o‘tishgan urinish”, – degan Buyuk Britaniya hukumati vakili.
Shuningdek, 10-fevral kuni Buyuk Britaniya mudofaa vaziri Ben Uolles qirollik razvedkasining Rossiya boshqa davlat bayrog‘i ostida Ukrainaga bostirib kirishga urinishi mumkinligi haqida ma’lumotlar olganini ta’kidlagan.
Liz Trass hamda Sergey Lavrov o‘rtasidagi muzokaralarda Rossiya TIV rahbari ushbu axborotni inkor etgan, shu bilan birga, NATOning kengayishi mamlakatni xavotirga solayotganini aytib, Moskva va London ikki tomonlama munosabatlarda kun tartibini o‘zgartirishi zarurligini bildirgan.
“Nonushta vaqtida BMT xavfsizlik kengashidagi ikki tomonlama hamkorlik masalalarini muhokama qilib olishimizga umid qilaman. Rossiya va Buyuk Britaniya ushbu tashkilot oliy organining doimiy a’zolari hisoblanadi. Menimcha, bu boradagi maqsadlarimiz mushtarak, sun’iy ravishda yuzaga kelayotgan turli muammolar haqida gaplashmasdan BMT xavfsizlik kengashidagi asosiy vazifalarimizni konstruktiv muloqot bilan yanada mustahkamlashimiz zarur”, — degan Sergey Lavrov.
Liz Trass bunga javoban London Moskva bilan hamkorlikka tayyorligi, ammo Rossiya rahbariyatining hozirgi qarorlari mamlakatning texnologik, ilmiy va ijtimoiy potensialiga salbiy ta’sir ko‘rsatishi mumkinligini qayd etgan.
Rossiya va Belarus harbiylari “Ittifoqchilik jasorati” qo‘shma o‘quv mashg‘ulotlarini boshlagani, Ukraina atrofidagi vaziyat keskinlashsa, Yaponiya Yevropaga gaz yetkazib berishga tayyorligi haqida xabarlar berilgan. Shuningdek, Britaniya Janubi-Sharqiy Yevropaga qiruvchi samolyotlar va harbiy kemalarini yuborishi mumkinligi xabar qilingandi.
Izoh (0)