АҚШ президенти Жо Байден Украинадаги америкаликларга мурожаат қилиб, уларни мамлакатни «ҳозироқ» тарк этишга чақирди. Бу ҳақда у NBC телеканалига берган интервьюсида маълум қилган.
«Америка фуқаролари ҳозироқ кетгани маъқул… Биз террорчилик ташкилотига қарши курашмаяпмиз, аммо дунёдаги энг йирик армиялардан бири ҳақида гап кетяпти. Бу умуман бошқа масала ва вазият жуда тез назоратдан чиқиб кетиши мумкин», — дейди у.
Байден билан суҳбатлашган мухбир Лестер Холт президентдан қандай ҳолатда АҚШ Украинага ўз фуқароларини эвакуация қилиш учун қўшин юборади, дея савол берган. «Ҳеч қандай ҳолатда. Америкаликлар ва руслар бир-бирига қарши ўқ уза бошласа, бу жаҳон уруши бўлади», — дейди Байден.
Шунингдек, 10 февраль куни Давлат департаменти АҚШ фуқароларини «Россия ҳарбий ҳаракатларининг хавфи ортиб бораётгани ва COVID-19» сабаб Украинага бормасликка чақириб, яна бир огоҳлантириш чиқарган эди. Айни вақтда Украинада бўлиб турган америкаликларга эса тижорий ёки шахсий транспортда зудлик билан мамлакатни тарк этиш тавсия этилган.
«Агарда Украинада қоладиган бўлсангиз, Россия томонидан амалга оширилиши мумкин бўлган ҳарбий ҳаракатлардан, эҳтимолий жиноятчилик, тартибсизлик ва потенциал ҳарбий зиддиятларда юқори даражада эҳтиёткорликка риоя қилинг. Айрим ҳудудлар хавф даражаси юқори бўлган зоналар ҳисобланади», — дейилади Давлат департаменти хабарида.
Эслатиб ўтамиз, 24 январь куни АҚШ Давлат департаменти Американинг Киевдаги элчихонаси ходимларининг бир қисмини, оилаларини эса тўлиқ эвакуация қилмоқчилигини маълум қилди. Бундан ташқари, Давлат департаменти АҚШ фуқароларини Украинани тарк этишга чақирди. Буюк Британия ва Австралия ҳам Киевдаги дипломатларининг оилаларини эвакуация қилишни бошлади.
Владимир Зеленский аввал ҳам икки марта украиналикларга Россия босқинининг эҳтимоли юзасидан мурожаат қилган. У халқини ваҳимага берилмасликка чақирган.
Изоҳ (0)