Toshkent viloyati Bo‘stonliq tumanida fuqaro tanishidan birga biznes qilish uchun pul olib, qaytarmay kelayotgani aniqlandi. Bu haqda Tergov departamenti xabar qildi.
Qayd etilishicha, tumanning Xumson ko‘chasida yashovchi M.N. (33 yoshli) Bo‘stonliq tumani IIB boshlig‘i nomiga ariza bilan murojaat qilgan. Unda 2020-yilning oktabr oyidan 2021-yil 26-dekabr kuniga qadar bo‘lgan vaqt oralig‘ida tanishi S.D. (29 yoshli) unga maishiy texnika vositalari savdosi bilan shug‘ullanishini, ushbu turdagi faoliyati uchun “pul aylantirish” hamda tushgan foydaga sherik qilishni va’da berib, uni aldab kelayotganini ma’lum qilgan.
Fuqaro ariza beruvchining ishonchini suiiste’mol qilish yo‘li bilan jami 17 ming 700 dollar va 183 million so‘m pulni olib, shu kunga qadar turli bahonalar qilib, pullarni qaytarmay kelgan. M.N. unga nisbatan qonuniy chora ko‘rishni so‘ragan.
Holat bo‘yicha Jinoyat kodeksining 168-moddasi 4-qismi “a” (juda ko‘p miqdorda firibgarlik) bandi bilan jinoyat ishi qo‘zg‘atilgan.
Hozirda jinoyat ishi bo‘yicha M.N.dan jami olingan pullar S.D. tomonidan qay tarzda va nimalarga ishlatib yuborilgani aniqlanmoqda.
Izoh (0)