Тошкент вилояти Бўстонлиқ туманида фуқаро танишидан бирга бизнес қилиш учун пул олиб, қайтармай келаётгани аниқланди. Бу ҳақда Тергов департаменти хабар қилди.
Қайд этилишича, туманнинг Хумсон кўчасида яшовчи М.Н. (33 ёшли) Бўстонлиқ тумани ИИБ бошлиғи номига ариза билан мурожаат қилган. Унда 2020 йилнинг октябрь ойидан 2021 йил 26 декабрь кунига қадар бўлган вақт оралиғида таниши С.Д. (29 ёшли) унга маиший техника воситалари савдоси билан шуғулланишини, ушбу турдаги фаолияти учун «пул айлантириш» ҳамда тушган фойдага шерик қилишни ваъда бериб, уни алдаб келаётганини маълум қилган.
Фуқаро ариза берувчининг ишончини суиистеъмол қилиш йўли билан жами 17 минг 700 доллар ва 183 миллион сўм пулни олиб, шу кунга қадар турли баҳоналар қилиб, пулларни қайтармай келган. М.Н. унга нисбатан қонуний чора кўришни сўраган.
Ҳолат бўйича Жиноят кодексининг 168-моддаси 4-қисми «а» (жуда кўп миқдорда фирибгарлик) банди билан жиноят иши қўзғатилган.
Ҳозирда жиноят иши бўйича М.Н.дан жами олинган пуллар С.Д. томонидан қай тарзда ва нималарга ишлатиб юборилгани аниқланмоқда.
Изоҳ (0)