2021-yilda butun dunyoda o‘z vazifasini bajarish vaqtida halok bo‘lgan jurnalistlar soni oxirgi 30 yil ichidagi ko‘rsatkichlarga nisbatan qisqardi, biroq matbuotga bosim darajasi barcha rekordlarni yangiladi. Bu haqda Jurnalistlar xalqaro federatsiyasi o‘z hisobotida ma’lum qilgan, deya xabar berdi “Interfaks”.
JXFning 31-yillik hisobotida 2021-yil davomida 47 nafar jurnalist qasddan qilingan hujum, portlashlar yoki otishmalar oqibatida halok bo‘lgani, yana ikki o‘lim tasodif deb topilganini qayd etgan. 2021-yilda jurnalistlar orasida kuzatilgan o‘limlar soni 2020-yildagiga nisbatan 18 taga kam.
“Bu boradagi ko‘rsatkichning tushganiga qaramay, 2021-yilda jurnalistlarga va OAV erkinligiga nisbatan tahdidlar soni keskin ortgan”, — deyiladi hisobotda.
JXF hisobotida hibsga olingan jurnalistlar soni rekord darajada ko‘paygani qayd etilgan: “365 nafar odam reportajlari tufayli panjara ortiga tushib qolgan, bu bir yil oldingi raqamdan (235 nafar) ancha ko‘p. Matbuotga qilingan ushbu hujumlar asosan OAVni tiyib turish uchun amalga oshirilgan”.
JXF jurnalistlarning jamoatchilikni qiziqtiradigan mavzularda qalam tebratgani uchun, ya’ni norozilik namoyishlarini yoritgani yoki koronavirus sabab yuzaga kelgan inqiroz haqida xabar qilgani uchun hibsga olinganini ta’kidlagan.
“2021-yilda Pegasus josus dasturiy ta’minotining matbuot erkinligiga tahdid bo‘lganining guvohiga aylandik, ushbu dastur orqali jurnalistlarga hujum qilish uchun ularning mobil qurilmalari kuzatilgan. Manbalar maxfiyligi va jurnalistlarning xabarlari sir saqlanishini ta’minlash tobora og‘irlashib bormoqda”, – deya yozgan JXF.
“O‘tgan yili kamida yetti nafar jurnalist ayol o‘z xizmat vazifasini bajarayotgan vaqtida o‘ldirilgan. Afg‘oniston bu borada eng ko‘p badal to‘lagan mamlakatlardan biri”, – deyiladi JXF hisobotida.
Shuningdek, xalqaro tashkilot butun dunyoda jurnalist ayollarni onlayn ta’qib qilish holatlari kuzatilayotganini ta’kidlab, tahrirriyatlar va hukumatlarni ushbu yovuzlikni bartaraf etish choralarini ko‘rishga chaqirgan.
Izoh (0)