Shamalyer shahrida joylashgan Fransiya banki bosmaxonasi hududida yirik yong‘in sodir bo‘ldi, deb xabar beradi Metro.
Ijtimoiy tarmoqlarda tarqalgan kadrlarda mamlakat Markaziy bankining banknotalar ishlab chiqaruvchi fabrikasidan quyuq tutun chiqayotganini ko‘rish mumkin. Ma’lum qilinishicha, yong‘in poligrafiya laboratoriyasida yuzaga kelgan.
Mahalliy OAVlarning ma’lumotlariga ko‘ra, yong‘in oqibatida hech kim halok bo‘lmagan, biroq 34 kishi yengil jarohat bilan Klermon-Ferrana shifoxonasiga yetkazilgan. Binoda zavodning jami 387 kishi bo‘lgan va ular voqea joyidan evakuatsiya qilingan.
Hodisa joyiga yetib kelgan o‘t o‘chiruvchilar yong‘inni “juda kuchli” deya tasniflagan, biroq qutqaruvchilar tomonidan zudlik bilan ko‘rilgan chora-tadbirlar natijasida olovning tarqalishi kamaygan. Yong‘inni o‘chirishga 60 nafar o‘t o‘chiruvchi va 24 ta maxsus texnikalar jalb etilgan.
Fabrika direktori Pyer-Iv Buassinoning ma’lum qilishicha, yong‘in ishlab chiqarishga shubhasiz ta’sir ko‘rsatadi, biroq u qadar katta ko‘lamda emas. “Shubhasiz bu ishlab chiqarishga ta’sir ko‘rsatadi, biroq biz xavotirda emasmiz, chunki umumiy ishlab chiqarish vositalariga zarar yetmagan. Zarur choralarni ko‘rish kerak. Bundan ham yomoni bo‘lishi mumkin edi”, — deydi u.
Hozircha yong‘in nima sababdan yuzaga kelgani aniqlanmagan, ammo rasmiylarning ta’kidlashicha, holat bo‘yicha, albatta, tergov o‘tkaziladi.
Ma’lumotlarga ko‘ra, Shamelyedagi bosmaxona Yevropa Ittifoqidagi banknotalarning beshdan bir qismini ishlab chiqaradi. Binoda yiliga 2,5 milliard banknota bosiladi.
Izoh (0)