18—20 февраль кунлари бўлиб ўтадиган хавфсизлик бўйича Мюнхен конференциясида Россиянинг расмий вакиллари иштирок этмайди. Бу ҳақда Россия Ташқи ишлар вазирлигининг расмий вакили Мария Захарова брифингда маълум қилди, деб ёзади Meduza.
Захарованинг таъкидлашича, «сўнгги йилларда конференция тобора трансатлантик форумга айланиб, ўзининг инклюзивлиги ва объективлигини йўқотмоқда», натижада «Москванинг ушбу тадбирга қизиқиши сезиларли даражада пасайган».
«Коммерсантъ» хабарига кўра, Россиянинг Мюнхенга расмий делегация юборишдан бош тортишига улар Европа Иттифоқида тасдиқланмаган вакциналар билан эмлангани учун олти кунлик карантиндан ўтишга мажбур бўлиши, шунингдек, сўнгги пайтларда тадбир ташкилотчиларининг Россия ташқи сиёсатини танқид қилувчи баёнотлари сабаб бўлган.
Аввалроқ Россиядан Мюнхен конференциясига юбориладиган делегация рўйхатига «Сбербанк» раҳбари Герман Греф, Бутунроссия суғуртачилар иттифоқи президенти Игорь Юргенс ва Россия Фанлар академиясининг Жаҳон иқтисодиёти ва халқаро муносабатлар институти президенти Александр Динкин киритилган эди. Россия президенти Владимир Путиннинг матбуот котиби Дмитрий Песков Путин бу йил ҳам конференцияда иштирок этмаслигини айтганди.
Хавфсизлик бўйича Мюнхен конференцияси 1962 йилдан бери ўтказиб келинади. Россия форумда 1999 йилдан бери қатнашаётган эди.
Россия президенти Владимир Путин фақат бир марта, 2007 йилда ушбу конференцияда қатнашди. У Мюнхенда нутқ сўзлади ва унда «бир қутбли дунё модели», АҚШ ва НАТОни танқид қилди. Ушбу нутқ Россия ва Ғарб ўртасидаги муносабатлар ёмонлашувининг бошланғич нуқталаридан бири сифатида кўрилади.
2010 йилдан бери Мюнхен конференциясидаги Россия делегациясига ташқи ишлар вазири Сергей Лавров бошчилик қилди (2016 йил бундан мустасно, ўша пайтда Россия бош вазири бўлган Дмитрий Медведев Мюнхенга келган). 2021 йилда эса пандемия сабабли конференция бекор қилинди.
Изоҳ (0)