Litva prezidenti Gitanas Nauseda mamlakat hududida AQSh qo‘shinlarining doimiy asosda faoliyat yuritishini so‘rab, Vashingtonga murojaat etmoqchiligini ma’lum qildi, deb yozmoqda Reuters.
“AQSh bilan Amerika harbiylarining rotatsion kuchlari Litvada muntazam bo‘lishini ta’minlash yuzasidan muzokaralar olib boramiz”, — degan Nauseda matbuot anjumanida.
Litva prezidentining fikriga ko‘ra, ushbu qadam NATO tomonidan tiyib turish siyosati va nafaqat Litva, balki butun mintaqada xavfsizlikni mustahkamlashga xizmat qiladi.
Avvalroq Gitanas Nauseda Germaniya va AQSh bilan Litvadagi harbiy kontingentni oshirish yuzasidan muzokaralar olib borayotgani xabar qilingandi. Prezident bu haqda Ukraina chegarasiga, xususan, Belarusga 100 ming nafar Rossiya harbiylari joylashtirilgani fonida gapirgan. Nauseda Litvaning 1990–1991-yillardagi mustaqillikka endi erishgan davridagi kabi o‘ta og‘ir vaziyatda qolgani haqida gapirgan.
Boltiqbo‘yi mamlakatlarida AQSh harbiylarining rotatsiyasi 2014–2017-yillarda o‘tkazilgan va Rossiyaning Ukrainadagi harakatlariga javob sifatida qabul qilingan. Litva, Latviya, Estoniya va Polsha NATOda xalqaro batalyon tuzgach, AQShning Boltiqbo‘yidagi harbiy bo‘linmalari ushbu mamlakatlarni tark etgan. Biroq 2019-yilda AQSh yana Litvaga 500 nafarga yaqin askari bo‘lgan rotatsion harbiy guruhlarni joylashtirishni boshlagan.
Avvalroq Estoniya va Latviya 693 million yevrolik harbiy texnika sotib olmoqchiligi, AQSh Boltiqbo‘yi davlatlarining Ukrainaga Javelin va Stinger yetkazib berishiga ruxsat bergani, Litva rossiyalik harbiylarning Belarusga kelishini to‘g‘ridan to‘g‘ri tahdid sifatida baholagani, Estoniya, Latviya va Litva NATOdan ularning hududidagi harbiy ishtirokini oshirishni so‘ragani haqida xabarlar berilgan.
Izoh (0)