Gurbanguli Berdimuhamedov COVID-19 ga test topshirdi va Ashxobodda Stomatologiya hamda pediatriya markazlarini qurish haqida topshiriq berdi

8-fevral kuni o‘tkazilgan hukumat yig‘ilishida Turkmaniston prezidenti Gurbanguli Berdmuhamedov Xitoyga qilgan safaridan keyin u va delegatsiyaning boshqa a’zolari uch kun karantinda o‘tirishgani, karantin me’yorlariga amal qilinganini ta’kidladi, deb yozmoqda “Xronika Turkmenistana”.

“Koronavirusga topshirgan test natijalari hammasi yaxshi ekanligini ko‘rsatdi”, – deya Turkmaniston davlat rahbarining so‘zlaridan iqtibos keltiradi “Turkmenistan Segodnya” axborot agentligi. Eslatib o‘tamiz, Turkmanistonda butun dunyoda pandemiya boshlanganidan beri koronavirus bilan kasallanish holati rasman qayd etilmagan.

Yig‘ilish davomida Berdimuhamedov Sog‘liqni saqlash va tibbiyot sanoati vaziri Nurmuhammad Ammannepesovni Turkmaniston yuqumli kasalliklar tarqalishini oldini olish bo‘yicha favqulodda komissiyaning vaqtincha rahbari lavozimidan ozod qildi va uning bu boradagi vakolatlarini ilm-fan, maorif, sog‘liqni saqlash va sport kompleksi rahbari, bosh vazir o‘rinbosari Sapardurdi Toyliyevga qaytardi.

Turkmaniston prezidenti mamlakatda sanitar-profilaktik tadbirlarni davom ettirish haqida topshiriq berdi va XXR rahbari Si Szinpin bilan muzokaralar yakuniga ko‘ra Xitoy tomoni Turkmanistonga koronavirusga qarshi 5 million doza taqdim qilganini bildirdi.

Shuningdek, Berdimuhamedov Ashxobodda yana bir Stomatologiya markazini qurish, shu bilan birga Xalqaro periatriya tibbiyot markazini bunyod etish maqsadga muvofiqligini qayd etdi.

Turkmaniston poytaxtining janubiy qismida Stomatologiya markazi bor va u 2013-yilda ochilgan. 2017-yilda Ashxobodda tibbiyot universiteti qoshida davolash xonalariga ega stomatologiya markazi ochilgan va u ham bemorlarni qabul qiladi.

Stomatologiya marakazining ro‘parasida Gurbansulton-Eje nomidagi ona va bola salomatligini himoyalash ilmiy-klinik markazi joylashgan va u yerda perinotologiya, pediatriya va bolalar jarrohligi bo‘limlari mavjud.

Avval Gurbanguli Berdimuhamedov Xitoy matbuotiga bergan intervyusida “yagona Xitoy” siyosatini qo‘llab-quvvatlashini bildirgani, undan oldin esa bobosi nomidagi harbiy maktab quriladigan joyga kapsula qo‘ygani haqida xabar qilingan.